Shillong, Nailur 17 : Ka Myntri ka koit ka khiah kong Ampareen Lyngdoh ha ka sngi Ba-ar, kala ban jur ia ka jingdonkam ban nang pynbun noh ia ka jingmang thungkam (sanction post) na ka bynta ki doktor bad ki nos hapoh ka Jylla.
Haba iakren bad ki nongthoh khubor, ka Myntri kala ong “Ngi la iakren man ka por bad u Myntri Rangbah ka Jylla bad ruh ia ka Tnad Finance bad Planning ban pynthika ba ngin nang pynbun ia ka jingmang ia ki kam na ka bynta ki doktor bad ki nos”.
“(Kane ka dei namar) ka rukom treikam bad kala dawa kham bun hynrei ka jingmang thungkam pat kam don” kala batai haba bynrap “Ka jingmang ia ki kam doktor kam shym la kylla la bun phew snem naduh u 1972 kumjuh ruh ka jingdon ki nos hynrei mynta ki jaka sumar kila nang bun bad ngi la don haduh ki kyrdan sub-centre”.
Ka Myntri kala ong ba ka Jylla kala mad ia ka jingeh ha ka jingduna jong ki doktor specialist palat ban ia ki medical officer.
“Ki doktor specialist haba ki leit pule specialist, kin hap ban iasoi ia ka bond bad ki Jylla kiba tyrwa ia ka jingpule. Ki don kum kine ki jingeh, ngi hap ban pyrshang ban wad ia ki lynti kumno ba ngin leh bad kaei kaba ngin iasaid bad ka Sorkar India” kala bynrap.
