Nongstoiñ, K’lyngkot, 19: Ka shlem pule jong ka Christian United M.E School kaba don hapoh ka shnong Langja West Khasi Hills District, ha ka sngi Saitjaiñ, ka la shah pynpra noh ha ki paidbah jong ki 7 tylli ki shnong, wat hapdeng ka jingkhang pyrshah jong ki bor District.
Kine ki Shnong ki kynthup ia ka shnong Langja, Khyllemsangrin, Umthlu, Ktiehthawiar, Mawribah, Ummawri, Mawjari, ki shnong kiba hap hapoh ka Synjuk ki Nongshynshar Shnong Langja Area.
Kum ban shu pynkynmaw hangne ba dang shen u District Magistrate jong ka West Khasi Hills Bah Garod L.S.N. Dykes, u la pynmih da ka hukum 163 BNSS, ba khanglad ïa ka jingthmu ban pynpra ïa ka skul Tbn N.S. Shangdiar Memorial Secondary School kaba don ha Langja.
Hynrei ki paidbah ki khlem sngap satïa bad mih ban leit ban pynpra noh ïa ka katei ka skul.
Ki khubor ba la ïoh lum da u nongthoh khubor, ki ïathuh ba kane ka skul ka don hapdeng ka kynrum kynram namar ka jingïakam trai hapdeng ki 7 shnong bad ki riew shimet, ha kaba ïa ka kyrteng jong ka skul ruh la pynmih ar tylli bad ïa kaba la tip ruh kum ka Tbn N.S. Shangdiar Memorial Secondary School bad ka Christian United M.E School.
Ki paidbah khlem da kheiñ shuh ïa ka kyndon ba la pynjari da u District Magistrate, dang step phyrngap ki la rah ïa ki lyngka bad ki tyrnem, ban lied bad pynpra naphang ïa ka skul. Ki bor jong ka aiñ ruh kim shym la lah shuh ban teh lakam ïa ki paidbah namar ka jingbun palat ki briew.
Kane ka skul ka dei kaba la seng naduh ki snem 1970 shaneng bad la ju tip ruh kum ka Christian United M.E. School Langja. Hynrei hadien katto katne por ka shnong ka la pynkylla noh ïa ka kyrteng sha ka Langja Upper Primary School. Hadien kata ïa ka skul la kam nongkynti noh da ki katto katne ngut ki briew kiba na kane hi ka shnong.
U samla Denborlang Nonglait bad u samla Sumarlang Kharsyiemlieh, ki la kam ba ka jingpynpra jong ka shnong ïa ka skul, ka dei namar ba ka shnong ka la plie noh da kawei ka ïing skul kaba paka bad kaba thymmai.
