Shillong, Risaw 10 : Ki paid Nongrep ka Shnong Lapangap, kila sdang ia ka jingia ot kba bad hiar sha la ki pynthor ban kheit ia u soh ka jingtrei shitom ha ryngkat ka jingpahara kaba khlain jong ki bor Pulit.
Ki Nongrep kane ka Shnong khappud ka West Jaintia Hills bad West Karbi Anglong, hynne ka sngi Ba-ar, kila hiar ot ia u kba ba kila rep hapoh ka shnong Liariongskai, Lapangap, kaba dei ka jaka ba mih ka thma iasiat jri bad khnam ryntieh hapdeng ki Nongshong shnong ka thain (Khasi-Pnar) bad ki Karbi.
Ia kane ka jinghiar ot kba ki nong Lapangap, la synran da ki bor pahara kiba khlain jong ki Pulit ka Meghalaya bad ki Pulit ka Assam ruh kumjuh, ban pynthikna ba kam dei ban don ka jingpynthut ia ki nongrep.
Lashai ka sngi Balang, ka jingia ot kba kan long ha ki hali ki pynthor kiba don ha ka shnong Nangjrong, kaba don marjan ka shnong ki Karbi bala tip kum ka Tahpat.
Ka jingiakynad kaba jur bha hapdeng ki Khasi-Pnar bad ki Karbi kala mih ha ka shnong Lapangap namar ka jingiakam trai ia kawei ka jaka ha ka thain. Ka jingiakynad kala mih tang namar ka jingleit thung symbai dieng jong ki paid Khasi-Pnar ha Loom Moopyrdet bad Loom Pdeinphniar kaba hap ha lapangap.
Ka jingiakynad kala khie puk ha ka 25 tarik Nailur, kaba la poi sha u pud ka jingialeh ban iasiat da ki jri bad u khnam ka ryntieh, kaba haduh lai sngi kynthih.
Ki bor District ka West Jaintia Hills bad West Karbi Anglong kila lum ia ka jingialang ba kyrkieh ha ka 28 tarik ban tem ia kane ka jingiakynad, kaba la wan iashimbynta da ki kynhun na Karbi Anglong bad na Lapangap.
Ia ka bor District ka West Jaintia Hills la ialam da u Deputy Commissioner BS Sohliya bad u Superintendent of Police Bah C Syrti katba ia ka West Karbi Anglong la ialam da ka Deputy Commissioner Krishna Baruah bad u Superintendent of Police U Barua.
Namar ba la poi ka aiom ot, kine ki bor District kila shim rai ban ai ia ka bor pahara ia ki paid nongrep ka Lapangap ba kin leit kheit ia u soh ba kila trei shitom baroh shikatta.
Ha kane ka jingialang, ki paid Karbi kila buh kyndon ia ki paid Khasi-Pnar ka shnong Lapangap ba lada ki kwah ban ioh leit ot ia u kba na ki pynthor, ki dei ban jynrat shwa ia baroh ki symbai dieng bala thung ha Loom Moopyrdet bad loom Pdeinphniar.
