Nongpoh, Lber 04 : Ka Tnad Execise ka Jylla ha ka janmiet sngi U Blei, kala hiar ban khynra ia ki jaka shna kyiad be-ain ha Ri-Bhoi District bad ioh bat ia kawei ka jaka shna kyiad beain kaba don ha Shillong By-pass hajan ka Umiam.
Kane ka jingkhynra ka dei kaba la pynlong halor ka jingbthah u Commissioner ka Tnad Excise da ka jingsam jingtip jong ka tnad Excise na Assam.
Ia ka jingkhynra la pynlong ha ki artylli ki jaka bala suba ba don kine ki jaka shna kyiad bein hynrei la ioh ban bat tang ia kawei kaba don ha Shillong bypass marjan ka Umiam.
Ki Pulit Excise kila kurup noh ia katei ka jaka shna kyiad beain bad kurup ruh ia shibun ki tiar ki tar ba pyndonkam ha ka ban shna ia ka kyiad. Kawei pat ka jaka ka dei kaba don ha Industrial Complex Umiam hynrei ha kane ka jaka ym shym la lap eiei satia.
Kane ka jingkhynra kala wan jia hadien ka jingshah bat kawei ka trok AS-11-AC-9144 ha Khanapara, kaba kut ia ki kyiad ba shna be-ain, kiba pynmih na ka jaka ba don ha Shillong bypass.
Haba kren sha ki lad pathai khubor hynne ka sngi Ba-ar, u Superintendent ka Tnad Excise na Ri-Bhoi Bah RC Lyngdoh, ula pyntip ba ka Tnad kala ioh ban kurup ia ki tiar ki tar bapher bapheer naduh ki machine bala pyndonkam kum ka Blending tags, storage tank, capping machine, production line, ki flavouring bad colouring agent nalor ki hologram ba shna thok jong ka Assam bad Meghalaya.
U iathuh ba ha kane ka jingkhynra, la ioh ruh ban kurup ia ki kyiad bala dep shna ba kynthup naduh ka OC, OC Blue, Royal Stag bad McDowell’s NO.1, kaba kot sha ka 23000 bilor. Nalor kata, la ioh kurup ruh ia ka label excise jong ka Meghalaya bad Assam nalor ki bilor thylli bad ruh ki carton ba song kyiad.
Une u Heh Ophisar u pyntip ba ka jingtohkit mynta ka dang iaid shakhmat ban lapdien ia ki briew kiba donkti ha kane ka kam beain bad kin sa jor ruh da ka ejahar sha ki pulit ba kin shah pynshitom kat kum ka ain.
