Nongstoin, Nailur 10 : Ka State Education Commission (SEC) ha ka sngi Ba-ar, kala lum ia ka jingialang jong ki lai tylli ki District ka West Khasi Hils, ban lum jingtip ia ka jinglong jingman jong ki jaka pule (skul/college) bad ki jingeh ba ki iakynduh ha kaban wanrah ia ka jingiaryngkat kyrdan bad ki skul ka sor Shillong.
Ka Commission bala khlieh da u Prof Sherwin May Sungoh kum u Chairperson, kala lum ia kane ka jingialang ha Vanni’s Hall jongka skul St. Peter Higher Secondary School, Pyndengrei, Nongstoin.
Ha kane ka jingialang la wan ban iashimbynta da ki Deputy Commissioner ka West Khasi Hills, South West Khasi Hills, Eastern West Khasi Hills bad kumjuh ruh ki Principal, ki Headmaster bad ki Nonghikai jong ki jaka pule bapher bapher kine ki lai District ka Jylla.
Ka jingialang kala iamir jingmut halor kiba bun ki mat kiba kongsan ban pynkylla dur ia ka pule ka dangle ha ka thain bad ruh ia ki jingdonkam jong ki jaka pule ba kin long kiba bit ba biang kat kum ka jingdonkam jong ki khynnah pule.
Shibun ki jingai jingmut kila mih halor ki jingeh kiba kynthup ia ka jingpynbiang ia ka umbam umdih sha ki jaka pue, ka bording elektrik, ki painkhana, ka jingdon ki nonghikai kiba la pyntbit, ka midday meal, ka jingpep skul shiteng por, ka jingpynrung skul bad kiwei kiwei.
Ka jingpynsngew kala mih ruh halor ka jingduna jong ki nonghikai bad ki nongtrei haki jaka pule, ka jingbym biang ki jingtei jong ki jaka pule, ki madan ialehkai, ki jingker kynroh bad ka jingdon tang kawei ka DIET na ka bynta ki lai tylli ki District.
“Ngi wan hangne ym ban ai jingkular eiei hynrei ban iohsngew ia ki jingeh, ki jingduna bad ki jingdkoh jong ka pule puthi ha kine ki thain bad ruh ban pynsngew sha ka Sorkar ia kine baroh khnang ba ka Sorkar kan leh eiei”, ong u Prof David R Syiemlieh nongaibuit jong ka State Education Commission.
Lah ban kdew hangne, ka Sorkar kala thaw ia ka State Education Commission ba kan ai jingmut ia ka Sorkar Jylla halor ki kam ba iadei bad ka jingpynkylla dur ia ka pule dangle ha Jylla- kaba kynthup naduh ka rukom pyniaid, ka jinglong jingman jongki jaka pule, ka rukom ai tulop, ka rukom pyniaid ia ki jaka pule, ka rukom buh iaka jingkhein jingdiah bad ban ai jingmut kiba kongsan naka bynta ban wanrah iaka jingkylla haka pule puthi ha kaba phai ruh sha ka NEP 2020.
