Hiar ka SIT sha Madhya Pradesh | Kurup ia ki jingdeng ksiar bad laptop ka Sonam

Shillong Jylliew 29: Ka Special Investigation Team (SIT) kala ioh kurup ia ki jingdeng jong ka Sonam Raghuvanshi bad u (L) Raja Raghuvanshi na ka jaka sah jong u Shilom James kaba don ha Ratlam District jong ka jylla Madhya Pradesh hynne ka Sngi U Blei.

Katkum ka kyrwoh na u Superintendent of Police ka East Khasi Hills u Bah Vivek Syiem, ula pyntip ba ka SIT hapoh ka jingialam u Sub Iinspector (SI) Bah Anthony Khongsit bad u (SI) Karan Pachua ryngkat ka jingkyrshan jong ki ophisar bad pulit jong ka Alkapuri Police Station kila ioh ban kurup ia ki jingdeng jongka Sonam bad (L) Raja Raghuvanshi na ka jaka sah ne ka Flat jongu Shilom James.

U Bah Vivek ula pyntip ruh ba ki pulit kila ioh kurup ruh ia ka Laptop, Pendrive bad katto katne ki kot kiba donkam, kiba dei ruh ki sakhi ba donkam ha ka jingshah pyniap u Raja.

Kane kadei ka sien kaba lai ba ka SIT jong ka Meghalaya kala leit sha Indore ha kaba iadei bad ka jingshah pyniap u Raja Raghuvanshi. Kila poi ha Indore ryngkat bad u Shilom James ha ka miet jong ka Sngi Saitjain bad kila pynlong ia ka jingwad bniah ia ka iing jongu kaba don ha Mahalaxmi Nagar ha ka por mynmiet.

Nangtei kila leit sa sha Ratlam, ha kaba kila lap ia ki jingdeng ksiar bad kila ioh kurup ruh kiwei kiwei ki sabut.

Ia mynta hi, u Shilom James u don ha ka Police Custody jong ki pulit ka Meghalaya. Ula shah kem ha ka por ba u dang thmu ban phet na Bhonrasa Toll Gate kaba don ha Dewas District ha ka 21 tarik u Jymmang. La wan ialam ia u sha Shillong ryngkat bad u Balbir Ahirbar ia kaba la khot sin da u Ballu bad u Lokendra Singh Tomar ha ka 26 tarik u Jylliew bad haba la ialam tian bishar, la phah ia ki ban set 6 sngi ha ka Police Custody.

Kine baroh 3 ngut kiba la shah kem ki la shah pynngat halor ka jingdonkti ha kaban pynduh pyndam ia ki sabut kiba iadei bad ka jingshah pyniap u Raja Raghuvanshi.