Shillong, Jylliew 30 : Ka Committee on Petitions of the Meghalaya Legislative Assembly ryngkat bad ka Ophis jong u Deputy Commissioner ka Ri Bhoi District, kila pynlong ia ka Awareness Programme bad ki Block Development Officer (BDO), Self Help Group (SHG) bad ki kynhun bapher hynne ka sngi Nyngkong ha Nongpoh.
Ia kane ka prokram la pyniaid da u MLA ka Mawlai bad Acting Chairman ka Committee Bah Brightstarwell Marbaniang namar ka jingbym lah ban poi u Chairman Pongseng Marak u MLA ka Bajengdoba.
Ki MLA kiba dei ki dkhot ka Committee kiba la wan iashimbynta ki kynthup ia u Remington Gabil Momin, Bah Charles Marngar bad u Dr. Mizanur Rahman Kazi, ha kaba la wan ban iashimbynta lang u Bah Mayralborn Syiem u MLA ka Nongpoh, u Abhilash Baranwal u Deputy Commissioner jongka Ri Bhoi District.
Baroh 4 ngut ki BDO jongka Ri Bhoi District kila wan iashimbynta ha kane ka prokram, kaba thmu ban pynsngewthuh shaphang ka kamram bad ki jingkitkhlieh jong ka Committee on Petitions bad ki rukom treikam ki jongka ban don ka jingiadei hapdeng ki nongshong shnong bad ka iingdorbar thawain ka jylla.
Haba kren ha ka jingialang u Bah Brightstarwell Marbaniang ula pynpaw ia ka jingsngewtynnad ha kaba kila ioh ia ka lad ban iakren markhmat bad ki shnong ki thaw bad ula ban jur ia ka jingdonkam ban ai ia ka jingpynsngewthuh shaphang ka iing dorbar.
Ka Petition Committee ka shakri kum ka rynsan na ka bynta ki nongshong shnong ba kin pynsngew ia ki jingsngewkhia bad ia ki jingeh ki jongki sha ka iingdorbar. Kiba bun kila tip shaphang ki 3 tylli ki paia kaba kynthup ia ka Legislature, Executive bad Judiciary bad mynta ngi don hangne ban pynsngew ba kumno ka iing dorbar lyngba kiba bun ki committee kum ka Petition Committee ka pynthikna ban don ia ka jingai jingkhein kaba khuid ba suba bad kaba iadonbynta lang bad ki paidbah”.
Katba u Bah Charles Marngar, ula pynshai ia ka bor jong ka Committee bad ula pynshlur ia ki SHG bad ia ki kynhun bapher ba kin mih shakhmat ban wanrah ia ki mat bad ia ki jingsngewkhia khnang ba ka Committee kan ioh ban pynsngew sha ka iingdorbar thawain ka jylla.
U Remington Gabil Momin, ula kyntu ia ki nongshong shnong ba kin ai ka jingiatreilang na ka bynta ban kyntiew ia ka shnong ka thaw.
“Ngi kyntu ia ki SHG bad ki kynhun bapher ba kin wanrah ia ki jingud jingnam ki jongki sha ngi. Ka Committee ka don hangne ban shim ia kine bad ban rah sha ka iing dorbar. Ngi pynshlur ia ki riewshimet kiba la nang la stad ba kin iarap lem ia kito ki bym nang bym stad ba kin lah ban pynpaw ia ki jingeh ki jongki”.
U Dr. Mizanur Rahman Kazi, ula pynpaw ia ka jingkongsan bad ia ka jingdon jingmut jong kane ka Committee.
“Ka Petition Committee kadei kawei na kiba la rim tam bad ka Committee kaba kongsan tam hapoh ka iingdorbar. Ka lah ban long kum ka jingkieng kaba pyniasoh ia ki paidbah bad ki nongthawain. Ka jingwan ka jong ngi mynta ka sngi ka long ban iarap ia phi ban sngewthuh kumno ka treikam bha kane ka atiar ban shimkhia ia ki mat sngewkhia ki jong phi”.
U Bah Mayralborn Syiem ula pdiang sngewbha ia kane ka sienjam bad ula ai khublei ia ka Committee kaba la pynlong ia kane ka prokram ha Nongpoh.
“Kiba bun hi kin ym tip eiei shaphang kane ka Committee bad ka rukom treikam ka jongka. Nga kyntu ia ki paidbah ka Nongpoh bad ka Ri Bhoi ba kin pyndonkam kat kaba lah bad ban mih shakhmat bad ki jingsngewkhia ki jongki, khnang ba ka Committee kan lah ban shimkhia lem bad ka sorkar”.
Ki nongiashimbynta na ki SHG bapher kila pynpaw ia ka jingsngewnguh ia kane ka sienjam bad pynpaw ruh ia ki jingsngew ki jongki bad ia ki jingtynjuh kiba ki mad bad pynpaw ia ka jingsngewtynnad ban ioh ia ka lad ban iakren markhmat bad ka Committee bad ka kyrpad ia ka Committee ban shimkhia bad ban pynbeit lem ia ka jingsngewkhia ka jongki.
, Self Help Group (SHG) bad ki kynhun bapher hynne ka sngi Nyngkong ha Nongpoh.){kind=link}