Shillong, Nailar 07 : Ka Khasi Students’ Union-West Jaintia Hills bad War Jaintia Circle, hynne ka sngi Balang, kila leit hiar jurip sha ki shnong khappud ka Ri-lum Jaintia bad ka Bangladesh ban peit thuh ia ka jinglong jingman ka suk ka shngain ha ka thain namar ka huri hura bad ka kam umsnam kaba jia mynta ha kane ka ri kaba don markhap.
Ka KSU kala hiar sha ki thain Dawki-Amlympiang bad kiwei de ki jaka khappud ka Ri Bangladesh. Ha kane ka jinghiar, ki Nongialam ka KSU kila iakynduh ia ki Nongialam Shnong ban iasyllok bad iamir jingmut kumno ban khanglad ia ka jing wan rungtuh ki nong Bangladesh, kiba lah ban phetwir nala ka jong ka Ri namar ki kam umsnam.
Ki Dorbar Shnong bad ka KSU kila shim ia ka rai ban long kiba la pynkhreh ban iakhun lang ia kino kino ki jingialeh lada ka long ha kano kano ka dur lada ki nong Bangladesh ki thmu ban wan tur be-ain sha ka Ri-lum Khasi bad Jaintia.
Nalor kane, ki Nongialam ka KSU kila iakynduh ruh ia u Officer Incharge ka Infiltration Check Post ha Dawki, uba la pyntip ba ki don ki nong Bangladesh kiba la pyrshang ban wan rung sha Meghalaya hynrei kila hap kynran dien noh namar ba ka Ophis ka Migration jong ka Bangladesh, kala khang pyrshah.
Ka KSU kala leit jurip ruh ia ki katto katne tylli ki jaka kiba ki nong Bangladesh ki ju pyndonkam ban wan rungtuh sha Jylla Meghalaya ba kynthup ia kawei ka jaka ha shnong Amlympiang. Ka KSU ka pyntip ba haduh mynta ki shipai BSF ki khlem pat peit pyrman satia ha kane ka jaka.
Ha kajuh ka por, ka KSU kala iakynduh ruh ia ki Nongialam Shnong ka Bakur bad Dawki kiba la pyntip ba haduh hynnin ka sngi, ki nong Bangladesh kila wan tur shaduh ka Zero Point ban khlong ia ki maw na wah.
