“Dei ki riewkhlaw ba pynpra ia u Mot u Tirot Sing ha Dhaka”: Sanbor
Shillong, Nailar 07: U Nongialam ka BJP bad MLA ka South Shillong bad u Myntri barim ha ka Sorkar, u Bah Sanbor Shullai u la pynrem jur ia ki briew kiba la pynpra ia u mot dur jong u Syiem Tirot Sing ia uba la pynïeng ha Dhaka, Bangladesh da ka Sorkar India.
U Bah Sanbor u la ong ba dei ki riew bymman kiba don ia ka mynsiem mrad mynsiem ksuid kiba la pynjot pynpra ia u mot jong u Tirot Sing ha Dhaka haba bynrap “Kine ki briew ki la long kum ki riewkhlaw namar wat ia u mot jong u nongpynioh laitluid ia ki, u Sheikh Mujibur Rahman ruh kim map satia bad pynpra beit phom”.
U Bah Sanbor u dei u nongmait phang ban pynïeng ia u mot sahnam jong u Tirot Sing ha Dhaka, ha kaba u la iakren shaduh Delhi bad lum ruh ia ki nongsynshar Hima ban iasyllok kumno ban pynurlong ia kane ka jingthmu.
Dei ha ka 16 tarik Rymphang 2024, la ioh ban plie ia u mot jong une u khlawait uba dei u Syiem ka Hima Nongkhlaw ha Indian Cultural Centre, ia uba ki paidbhur ki la pynpra phom ha ka jingiakynad ha katei ka ri.
U Bah Sanbor u la ong ruh ba un iakren bad ka Sorkar na ka bynta ban tei biang ia u mot ba shirynïeng jong u Tirot Sing ha katei kajuh ka jaka.
