Shillong, Nailar 22: U Myntri Khynnah ka Ministry Jal Shakti Dr Raj Bhushan Choudhary, ula lum ia ka jngialang ban khmih bniah ia ka jingpyniaid ia ki scheme jong ka sorkar pdeng hapoh ka South West Khasi Hills District.
U Dr.Choudhary ha ryngkat ka jingsynran lang u Bah Comingone Ymbon, Myntri ka tnad Water Resourcec, ula leit jurip ia ki projek bapher bapher ba la bei tyngka da ka Sorkar Pdeng kaba kynthup ïa ka Hydro Meteorological Station hapoh ka National Hydrology Project ha wah Umngi, ka Phodumtyngkoh- Phodtangjem Minor Irrigation Project ha ka shnong Rangmaw, ka Miyawaki Project ha Pyndenspar, ka Amrit Sarovar Project Phase- II ha ka shnong Sakwang bad ka MGNREGA project ha Phot Mawpon.
Ula leit ruh ban jurip ia ka Flow Irrigation Project (FIP) kaba la pyntreikam da ka Water Resource Department ha Phot Umiew.
U Myntri Sorkar ula iakynduh ruh ia ki nongmihkhmat na ki tnad bapher bapher bad ki bor pyniaid district ha ka jingialang kaba la long ha Circuit House, Mawkyrwat.
Ki ophisar na ka Community & Rural Development (DRDA), Integrated Child Development Scheme (ICDS), Public Health Engineering, Prime Minister’s Employment Generation Programme (PMEGP), Public Works Department (Roads), Water Resources, Soil and Water Conservation Department, Sarva Shiksha Abhiyan (SSA), Health, Agriculture, Horticulture bad MePDCL kila ai iaka jingbatai kaba bniah halor ka jinglah bad ka jingiakynduh jingeh ka jongki ha ka jingpyntreikam ia ki projek ha ki tnad jongki.
Haba iakren bad ki lad pathai khubor, u Myntri ula pynpaw ba ka sorkar pdeng ka buh hakhmat eh ban kyntiew ïa ka thaiñ shatei lammihngi ha baroh ki liang.“Kala don ka jingpyrkhat kyrpang jong u Myntri Rangbahduh ka ri u Narendra Modi, ban kyntiew ia ka roi ka par jong ki Jylla ka thaiñ shatei lam mihngi bad kumta ka jingwan jurip ki Myntri ka Sorkar Pdeng ïa ki jylla ba shatei lam mihngi man la ka por ka long ban pynthikna ba dei ban pyntreikam sted ïa ki kam pynroi jong ka sorkar pdeng”.
“Mynta ka sngi, nga la khmih bniah ïa ka jingpyntreikam ïa ki skhim jong ki tnad bapher bapher ha ryngkat bad ki bor pyniaid district. Ka jingthmu ka long ban khmih ïa ka kyrdan jong ka roi ka par ha ka jylla ha ki bynta bapher bapher bad ka jylla Meghalaya ka ieng haei haba ïanujor bad kiwei pat ki jylla jong ka ri”, la ong u Myntri Khynnah.
Hadien ka jingialang, u Myntri ula leit ruh ban jurip iaka shnong Mawten bad Nonglang bad ula leit jurip ruh iaka jingpyntreikam ia ka Greater Mawkyrwat Water SupplySchme bad ka Nonglang Water Supply Scheme.
Ula ïakren ruh bad ki nongïoh jingmyntoi na ki skhim jong ka sorkar pdeng, kynthup ïa ka Jal Jeevan Mission bad ula shem ruh ba kala don ka jingpyntreikam bha ïa kine ki skhim ai jingmyntoi ia u paidbah bad ula kyntu ia ki bor pyniaid district ban pynthikna ba baroh kiba dei hok ban ioh ia ka jingmyntoi kidei ban ioh ia ka jingmyntoi.
