Shillong, Risaw 05: U Myntri ka tnad bording u Abu Taher Mondal hynne ka sngi Saitjain, ula leit jurip ia ki Relief Camp ne ki jaka sah ba shipor kiba don ha Dalu bad ha ki shnong kiba marjan bad ula iakynduh bad iakren ruh bad ki longiing kiba la shah ktah na ka jingshlei um.
“Watla ka jingling jingman kala kham biang, hynrei ki jingpyntip lypa iaka jinglong jingman jong ka suinbneng ki paw ba kan don ka jingslap jur ha kine ki 24 kynta kiban wan. Ki bor pyniaid District, BDO bad ki nongtrei kila lei tai jingiarap bad jaka sah ia ki lanot. La bthah ia ki paidbah ba ki dei ban don ha ki jaka kiba shngain ha kine ki 24 kynta kiban wan bad ban bud ia ki jingbthah ha kaba iadei bad ka jinglong jongka suinbneng” ong u Mondal.
Ula pyntip ruh ba la bthah ia baroh ki tnad ba kin shimkhia mardor bad la bthah ruh ia ka tnad ka koit ka khiah ba kin leit jngoh ia ki jaka sah shipor bad ban ai iaka jingkyrshan ia kaba donkam.
“La lah ban pynbiang ia ka bording elektrik ha ki jaka kiba don ha ka thain Dalu kaban iarap naka bynta ban treikam ki Mobile Network bad ka Internet” ula ong.
U Myntri ula leit ruh ban jurip ia ka Dalu CHC ban khmih ia ka jingbit jingbiang ia kito kiba la mynsaw na ka jingshlei um bad hadien kane ula lum ia ka jingialang bad u DC jongka West Garo Hills bad BDO, Dalu ha ka ophis treikam jongka Block.
