Shillong, Jylliew 20: Shitaiew hadien ka jingmih khubor ba shong synjor bad orpait lut ka jingtei jong ka Model Degree College ha Patharkhmah, u MLA ka Jirang Bah Sosthenes Sohtun bad u Senior Consultant ka Rashtriya Uchchatar Shiksha Abhiyan (RUSA) kila hiar jurip ia kane ka College bad shem ba ka jingorpait kam dei satia kaba heh hynrei dei tang ki bynta jong ki jingtei ba pyniasoh ia ka Building(expansion Joints).
Kat kum ka khubor bala mih ha kawei ka kot khubor phareng la kynnoh ba kane ka jingtei ba dang shu tei thymmai (Model Degree College) bala bei tyngka da ka RUSA haduh T. 11 klur, kala orpiat ha kiba bun ki bynta jong ka jingtei bad kaba lah ban buh ha ka jingma ia ki samla pule lashai lashisngi.
Hadien kane ka khubor, u MLA Bah Sosthenes bala synran lang da u MDC Bah Victor Rani bad ki Heh ka RUSA kynthup ia u Bah B Tariang Senior Consultant Civil Works bad Bah R Mawroh, Principal Consultant kila leit jurip ban jngoh bad pynshisha ia kane ka khubor.
Haba iakren bad ki nongthoh khubor hadien ka jingjurip, u Bah B Tariang na ka RUSA, ula ong ba kine ki dak orpait kila paw ha ka jingtei kim dei satia kiba heh hynrei ki dei tang ka jingpait ka plastar na ka jingtei ba pyniasoh ia ka building kaba don haduh lai Block kata ka Block A, B bad C.
“Naba ka jingtei ka long kaba heh kumta ban iada ia kane ka jingtei na kino kino ki jingjia ba sngewsih khamtam ha ka jing khynniuh jumai, ia kane ka jingtei la shna ha ki lai tylli ki Block bad dei ki bynta ba pyniasoh ia kine ki Block kiba pait ka plastar” ula ong.
U Bah B Tariang ula pyntip ruh ba ka RUSA kan sa khmih mardor ia kine ki dak orpait bad kan sa klam noh da ki klam ba la shna kyrpang khnang ban iada ia ka jingarpait. Ula pyntip ruh ba ka RUSA kan sa nang ioh ia ka song pisa ba T 3 klur ban pyndep ia kane ka jingtei nalor ka jingsiang ia ka surok ba pyniasoh sha ka College, ka jingpynbiang ia ka umbam umdih,ka bor ding elektrik bad kiwei kiwei ki ban sa pyndep noh shen.
Ha kajuh ka por, na ka liang u MLA ula pynpaw ia ka jingbynniaw halor ka jingpynih ia ka khubor ha kawei ka kot khubor bad ong ba kane ka khubor ka dei kaba la pynmih khlem da pynshisha khamtam na ki Borkhmih ba dei peit.
U Bah Sosthenes ula ban jur ruh ba ki paidbah kim dei ban shah ialam bakla na kane ka khubor hynrei ki dei ban iaroh ia ka Sorkar MDA ba ialam da u Conrad Kongkal Sangma kum u Myntri Rangbah uba la ai ia shibun ki kam pynroi hapoh ka JIrang Constituency tang ha kine ki 4 snem bala leit noh khamtam eh ban kyntiew ia ka kam pule dangle, ka koit ka khiah bad ki surok.
