Shillong, K’Lyngkot 11: U Symbud Myntri Rangbah ka Jylla ba khmih iaka tnat pynroi sor Bah Sniawbhalang Dhar ha ka sngi Palei, ula leit jurip iaka Wahiajer Multi Sports Complex kaba dang shna thymmai ha West Jaintia Hills District.
Kane ka Sports complex, kadei kaba nyngkongeh ha Rilum Jaintia Hills iaka ba u Myntri Rangbah ka Jylla u Conrad K Sangma un plie paidbah haka 23 tarik mynta u bnai.
La mang T. 25 klur ban tei ia kane ka Sport Complex lyngba ka State Plan Scheme bad ka Sports Authority of India’s Khelo India Infrastructure Scheme.
Ki jingdon ha kane ka Sports Complex ki kynthup Artificial Football Turf, Synthetic Athletic Track, ka jaka peit kai paidbah, ki jaka shong jah thait ki nongialehkai bad ki kamra ophis.
Haba jurip ia kane ka Sports Complex, u Bah Sniawbhalang uba dei ruh u MLA ka Nartiang constituency ula ong kane ka jingjurip kadei lang ban plie iaka Sports Complex ha Wahiajer.
Ula ong ba ka thong kadei ban kyntiew iaki kam ialehkai daka ba pynbha iaki jingdonkam namar kane kan ai mynsiem iaki samla ban phai khmat shaki kam ialehkai bad ula ong “Kane kan plie lad iaki samla ban pyni iala ki sap haki kam ialehkai”.
