Shillong, Lber 12 : U Myntri Rangbah ka Jylla Conrad K Sangma ha ka sngi Palei, ula hiar jurip ia ki Shnong bapher bapher ha sor Tura ban peit thuh ia ka jinglong jingman hadien ki jingkulmar bad ki kam wiang ding ia ki nongkynti ha ka thain.
Ha kane ka jingjurip, u Myntri Rangbah ula ioh iakren bad ki paidbah, ki Nongialam Shnong bad ki Ophisar haba bishar ia ki jingpyrshang ban wanrah pat ia ka jinglong ba jai jai ha kylleng ki jaka jong ka sor.
U Myntri Rangbah ula leit jurip ruh ia ki jaka kiba don ka jingthang dukan bad ki iing bad kular ba ka Sorkar kan sa shim ia ka sienjam ba donkam ban kyrshan ia ki briew kiba shah ktah kynthup ki trai dukan.
Ha kajuh ka por, ki nongshongshnong kynthei bad shynrang kila iamih paidbah hynne ka step ban iashimbynta ha ka jingpynkhuid ia ki Shnong ki thaw bad ki jaboh jabain kiba mih na ki jingkulmar ha kylleng ka sor Tura. Lah iohi ba ki nongshongshnong kila rah la u synsar bad ki bolsha ban iakhat ia ki jaboh jabain, ki mar ba ing, kiba sah na ka jingkulmar.
Ia kane ka jing pynkhuid lah leh ruh ha ki jaka iew bapher bapher kynthup ki rud surok ban pynlong biang ia ki kumba ki ju long. Kane ka sienjam ka pyni ia ka jingialong kawei hapdeng ki nongshongshnong kila pynpaw ia ka jkngthrang ban tei pat bad ki wanrah biang ia ka jinglong jingman kumba ju long ha kane ka Sor.
Ki bor sorkar bad ki Nongialam Shnong kila ai ka jing iaroh ia ki paidbah bad pynpaw ba kum kine ki kam ki don ia ka bynta kaba kongsan ban wanrah pat ia ka jingsuk bad ka jinglong ba jai jai hapoh ka Sorkar.
