Shillong, Naitung 23 : U Chief Executive Member (CEM) ka Khasi Hills Autonomous District Council (KHADC) Shemborlang Rynjah,ha ka sngi Balang, ula leit jurip ia ka khlaw Mawpat bad pynbna ba ka Executive Committee (EC) jong u, kan sa shong shen ban tohkit halor ka jingkynnoh ioh thied jaka beain bad ban shim ia ka rai bad ki sienjam ban iada ia kane ka khlaw.
Ia u CEM la synran da ki Executive Member (EM) bad ki Ophisar na ki lai tylli ki Tnad ka Council- Ka Elaka, Land bad Forest-ha kane ka jingjurip, kaba la pynlong ruh hadien ka jingioh pdiang ia ka jingujor n aka Women bad YouthWing jong ka Voice of the People Party (VPP).
Kat kum ka jingong u CEM, ka khlaw ha Mawpat ka dei kaba la pynbna kum ka ‘Law Adong’ (ka khlaw kaba la iada bad khang ban leh ia kano kano ka kam) ha u snem 2014.
Haba iakren bad ki nongthoh khubor, u CEM ula iathuh ba ha kane ka jingjurip, ula lap ia bun tylli ki mawpud bala pynieng ha kane ka khlaw. Ula kubur ruh ba ki don ki khubor kiba pynpaw ba katto katne ki MLA ruh kila ioh ban thied jaka ha kane ka khlaw.
“Hynrei, ngim pat tip satia jong no kine ki mawpud ki dei bad mano bala pynieng ia ki. Namar kata, ka EC kala rai ban iakynduh shen ha kaban tohkit ia ka jingkynnoh thied jaka beain ha kane ka khlaw bad ban shim ruh ia ka rai bad ki rai kiba donkam ban iada ia ka” ong u CEM.
“Ia mynta hi, ngam pat tip la kine ki briew, kiba la pynieng mawpud, kila ioh jingbit lyngba ki lynti kiba dei ne kumno bad hato ki dei ne em ki khun ki hajar ka Hima Mylliem naba ngi sheptieng ba ki lah ban don ki briew kiba dei nabar ka Hima, kiba la ioh jaka hangne” ula ong haba ban jur ia ka jingdonkam ban iaid kat kum ki kyndon jong ka soskular bala iasoi ha ka 22 tarik Jymmang, 2014.
U CEM u pyntip ba ha ka jingbishar ia ki kot ki sla halor kane ka khlaw, la shem ba kane ka khlaw ka dei kaba ju tip kum ka “Khlaw Sumar Kyrpang”.
Hynrei, u ong ba ka KHADC kala pyndam noh ia ka jingpynbna ha u 2019 bad aiti biang ia kane ka khlaw sha ka Hima Mylliem. “Namar kata, ka EC kan sa shong noh mar mar ban rai halor kane ka khlaw” ula bynrap.
U CEM ula ban jur ba ka Council ka dang ap ruh ia ka kaiphod ba mano ba pynieng ia ki mawpud ha kane ka khlaw bad kan ap shuwa ia ka kaiphod hashuwa ban shim ia ka rai.
Ula pynshai ruh ba ka KHADC ka khlem khot satia ia ka Hima Mylliem ban leit jurip lang, hynrei kaei kaban mih na ka jing ialang jong ka EC kan sa nang ai jingshai shuh shuh halor kane ka kam.
 ka Khasi Hills Autonomous District Council (KHADC) Shemborlang Rynjah,ha ka sngi Balang, ula leit jurip ia ka khlaw Mawpat bad pynbna ba ka Executive Committee (EC) jong u, kan sa shong shen ban tohkit halor ka jingkynnoh ioh thied jaka beain bad ban shim ia ka rai bad ki sienjam ban iada ia kane ka khlaw.){kind=link}