Hiar jurip u Bah Paul ia ki project ha West Shillong | Kular ban pyndep kloi noh

Shillong, Risaw 17: U Myntri Sorkar barim bad MLA ka United Democratic Party (UDP) na West Shillong Bah Paul Lyngdoh ha ka sngi Thohdieng, u la hiar jurip ia ki jaka bapher bapher hapoh ka constituency bad u la pynthikna ban pynkloi ia ki projek kiba iadei bad ki surok, ki nala um bad ka jingsam umbam umdih.

Ia u Bah Paul uba dei ruh u nongaibuit ka tnad Social Welfare, la synran lang da ki heh Sorkar naki tnat bapher bapher haka jingdonlang ki Nongialam ka Synjuk Shiphew Dorbar bad ki Myntri ka Hima Mylliem.

“Nga sngewkmen ban iasam jingtip bad phi ba ngi la mynjur ban pynsted ia ka kam” ong u Bah Paul.

U Bah Paul u la pynpaw ba kiba bun ki bynta jong ka kam ki dei kiba la kynthup lang ha ka projek pynbha bad pynitynnad ia ka Iewduh haka jinglut kaba T.25 klur ia kaba la pynbna da u Myntri Rangbah ka Jylla haki katto katne bnai bala dep.

“Kawei pat ka bynta ka dei shaphang ka jingpynthymmai ia ka surok bah kaba la don lypa. Ngi sngewkmen ba ka NHIDCL ka la ai jingkyrshan pura. Ki la pynkhreh ia ka jingkhein jingdiah na ka bynta kane ka jingpynbha bad pynthymmai ia ka surok kaba la don lypa bad tang hapoh lai taiew, ki lah dei ban khot Tender ban pyntrei ia ka surok” u la ong.

U Bah Paul ula shong bishar ruh ia ki jingujor na ki Dorbar Shnong ha kaba iadei bad ki jingtei ba la shna da ka Meghalaya Urban Development Authority (MUDA) ha Qualapaty kiba la sah khongreng khlem da don briew ba pyndonkam mynta la palat ar snem.

“Ngan sa lum ka jingialang bad u Chairman ka MUDA ban wad ia ka lad lynti ban weng noh mardor ia ka jingeh, la ka long da kaba khang tala ia ki dukan (stall) ne pynpra ia ki ne ailad ia u Contractor ban pyndep ia ka jingtrei bad nangta ailad ia ki nongshong, kaba mut mano mano ba pyniaid ia kine ki dukan ban shimti mardor” u la pynthikna.

U MLA u la pynthikna ruh ba ka kam kan sdang shen bad ong, “Kyrmen, ngi dei ban lah ban pynkut noh shwa ban kut ka aiom Khristmas 2025.”