Shillong, Risaw 17 : U Myntri Rangbah ka Jylla Conrad K Sangma ha ka sngi Thohdieng, ula pyntip ba ula buddien bad tynruh ia ka Sorkar Pdeng na ka bynta ban pynioh noh la ka jong ka Meghalaya IAS cadre.
“Nga la iai buddien ban pynioh noh la ka jong ka Meghalaya IAS cadre naduh u snem 2019 bad nga kyrmen ba ngin sa ioh shen ia kane. Ka jingpynbeit ryntih ha ka MCS ka long kaba kongsan, kumba ki long na ka bynta kiwei pat ki jingshakri” ong u Conrad.
U CM ula kren ia kane ha ka jingalang ba shisien shisnem jong ka Meghalaya Civil Service Officer’s Association (MCSOA) ba long ha State Convention Centre, Shillong.
U Myntri Rangbah ula iaroh ia ki Ophisar MCS namar ka jingaiti jong ki ha ka kam bad ka jingpyn skhem ia ka jingkut jingmut jong ka Sorkar ban pynkhlain ia ki rukom treikam ha ka Jylla.
“Haba kut jong ka sngi, baroh ngi iatrei na ka bynta kajuh ka thong-ban shakri ia ki paidbah ka Jylla jong ngi. Ym don satia ki kam, ym don satia ki policy, ymdon satia ki rai kiba don jingmut lada ngim pynkynmaw ialade ba ka thong jong ngi ka long ban wanrah ia ka jingiapher kaba sngewtynnad ha ka jingim ki paidbah” ula ong.
Ula kyntu ia ki Ophisar ba kin iai bteng ban shah ialam da ka jingthmu bad ka jingshakri haba ong “Ka kyrdan kan kylla hynrei ka jingthmu ka dei ban neh beit kumjuh”.
Haba pynpaw ia ka jingkyrmen halor ka jingkiew shakhmat ka Jylla, u Conrad ula pyntip ba ka Jylla ia mynta ka dei kaba wan ba-ar ha ka jingkiew sted ka ioh ka kot ha India, kaba la kynjoh palat 10 % ka jingkiew bad khmih lynti ban kot ia ak 12-14% ha ki snem ban wan.
“Ka khana jong ka jingkiew shaphrang ka Jylla ka dei jong ngi lang baroh” ula bynrap.
Kiwei pat kiba ai jingkren ki kynthup ia u Commissioner & Secretary ka Sorar Jylla Bah Cyril V Diengdoh, u President ka Meghalaya Civil Service Officer’s Association Ashish M Sangma bad kiwei kiwei.
