Poi u MP ban tih bniah ia ka jingkam ba ktah ia ki tyllong Um
Nongpoh, Nailur 04 : Ki bor District ka Ri-Bhoi ha ryngkat ka NHIDCL hynne ka sngi Balang, kila hiar jurip ia ki jaka ban pyniaid lynti ia ka surok 4-Lane ha shnong Umroi Madan halor ka jingmih ki jingkam ba kane ka surok kan ktah ia ki tyllong um jong ka Shnong.
Kane ka surok 4-Lane ka dei ka ban pyntrei naduh na Lad Umroi sha Malidor, East Jaintia Hills District.
Ia kane ka kynhun jurip la lamkhmat da u Additional Deputy Commissioner Bah A Myrthong ha ka jingiadonlang ki Ophisar ka Tnad Water Resources, ki Heh ka NHIDCL bad ki Nongialam Shnong ka Umroi Madan.
U MP ka Lok Sabha na Shillong constituency Bah Ricky AJ Syngkon, ula leit ban iadon bynta lang ha kane ka jingjurip ban sngap bad peit dalade halor ka jingujor ba ka surok 4-lane kan sa ktah ia ki tyllong um jong kane ka shnong ha Umroi.
Lah ban kdew, u Deputy Commissioner ka Ri-Bhoi Abhilash Baranwal, ula bthah ia u ADC bad ki Ophisar ka Water Resources ba kin pynlong ia kane ka jingjurip hadien ka jingioh pdiang ia ka jingujor na ki katto katne ki rangbah jong ka shnong Umroi Madan ba pyrshah ban pyniaid lynti ia ka surok 4-Lane na ki ranab lum ba don ki tyllong um ka Shnong.
Ki Nongshnongshnong kila pynpaw ba kim pyrshah satia ia ka jingwan ki kam pynroi ha Shnong hynrei kaei kaba ki pyrshah ka long halor ka nongrim ioh ba kane ka surok 4-Lane ka ktah ia ka tyllong um kaba don tang kawei ha Shnong, kaba ki paidbah ki shaniah ia ka umbam umdih.
Ki Ophisar kiba jurip kila pynpaw ba kim pat lah satia ban batai shai la kane ka surok 4-Lane kan ktah ne em ia ka tyllong um hynrei kila pynpaw ba ia kane ka kam yn sa sngewthuh bha hadien ka jingwan jurup da ki riew shemphang, ka ban shimpor ym duna ia ka shisnem.
Ki pyntip ba ia ka kaiphod jong ka jingjurip kin sa aiti sha u Deputy Commissioner u ban sa lum ia ka jingialang ban shong pyrkhat halor kane ka kam.
U Bah Ricky ula pynpaw ba ka jingwan iadonlang jong u ka dei halor ka nongrim ka jingud jingnam jongki nongshnong shnong ka Umroi Madan bad pyntip ba ula wan khnang ha kane ka sngi ban iakynduh ruh ia ki paidbah ha kaban sngap ia ka jingeh jong ki.
