Shillong, Rymphang 14 : Ka Tnad Education ka Sorkar Jylla haba pyntreikam ia ka hukum ka Iingkashari Supreme Court, ha ka sngi Thohdieng, kala hiar ban jurip ia ka Campus ka CMJ University kaba don ha Jorabat bad bthah ia ki bor pyniaid ba kim dei ban pynkhih ne rah ia ki tiar ki tar napoh ka Campus kynthup ki kot ki sla.
Ia kane ka jingjurip la pynlong da ki 3 ngut ki Heh Ophisar ka Tnad bad la synran da u Executive Magistrate ka Ri-Bhoi District lem bad ki Pulit.
Kane ka kynhun kala iakynduh bad iakren ia u Vice Chancellor bad Registrar ka CMJ University, ban shimti ha kaban khmih hi ia ka Campus ka University.
Kane kala wan jia hadien ba ka Iingkashari Supreme Court kala hukum ban pynduh pyndam noh ia kane ka University namar ki kam thok kam shukor ia ki samla pule.
Kane ka kynhun kala pyntip ia u Vice Chancellor bad Registrar ka University ba ka Sorkar kan sa thung ia u Administrator jong ka University bad ba kane ka University ka dei ban sangeh lut ia ki kam pyniaid pisa, pyniaid kam ha Ophis bad ka pule dangle.
La bthah ruh ia ka University ban pynthikna ba kam dei ban don ka jingpynkynriah ne rah ia ki tiar ki tar napoh ka campus, ki files, ki computer, hard disk lane kiwei kiwei.
