Shillong, Jymmang 08 : Ki Bor District ka East Khasi Hills bad ka Ophis jong ka Defence Estate Officer, Guwahati, kila pynlong ia ka jingjurip hynne ka sngi Balang, ia ki Iing ba shna be-ain ha Lum Survey bad ka jingkynnoh kala mih ba kine ki Iing be-ain ki dei jong ki poiwir ba na Bangladesh.
Kane ka jingkynnoh kala mih na ki 3 ngut ki briew kiba shong dukan ha Lum Survey, kiba dei ruh ki briew kiba dang iakhun mukotduma halor ka hok longtrai ia kane ka jaka ba ki shna dukan pyrshah ia ka Ophis u Defence Estate Officer.
Kine ki lai ngut kila iadonlang ha ka jingjurip kaba la pynlong da ka Ophis u Deputy Commissioner ka East Khasi Hills District bad ka Ophis u Defence Estate Officer, Guwahati ha ka jingiadon ryngkat ki Ophisar ka Shillong Municipal Board, ka Shillong Contonment Board, ka Meghalaya Urban Development Agency bad ki Nongialam ka Hynniewtrep Youth Council.
Na ka liang ka SMB kala lum jingkhein bad lum kyrteng ia baroh ki trai jong ki Iing kiba kynnoh shna beain ha kane ka jaka.
Ha kane ka jingjurip, la lap ba ki don haduh 80 tylli ki Iing ha kane ka jaka hynrei napdeng kine ki Iing, haduh 40 tylli kila khang tala.
La kynnoh ba bun na kine ki briew ki dei ki Muslim kiba kam ialade ba ki dei kiba wan na Assam, Uttar Pradesh bad kiwei kiwei ki Jylla ka Ri.
Lah ban kdew hangne ba kane ka jingjurip kala wan jia hadien ka jingdawa jong ka seng Hynniewtrep Youth Council (HYC) ban kyndang ia baroh ki iing ba shna beain ha kane ka jaka (Lum Survey).
Shen u Magistrate un sa aiti noh ia ka kaiphod sha u Deputy Commissioner ka East Khasi Hills ba un leh ia kaba donkam.
“Ki briew jong ka bor Disrict kila pynlong ia ka survey bad kila shim jingkhein ia ki Longiing. Kila lap ba ki don palat 80 tylli ki Iing ba shong beain ha kane ka jaka (ba hap hapoh ka Defence Estate Office). Ngi sngewnguh ia u DC ba u pynlong ia kane ka jingjurip shuwa shitaiew ba ngi ai por” ong u President ka HYC Roy Kupar Synrem haba iakren bad ki nongthoh khubor.
Kat kum ka jingong jong u, kiba bun na ki briew ba sah beain ha kane ka jaka ki dei na Assam, Uttar Pradesh bad kiwei kiwei ki Jylla.
“Ngin ap mynta ia ka kaiphod ka ban aiti da u Additional Magistrate sha u DC” ong u Bah Roykupar.
“Ka jingdawa jong ngi lyngba ki bor district bad ka DSO ka long ba kin leh eiei mardor ha kaban kyndang ia kine ki Iing beain na kane ka jaka” ula bynrap.
Haba kylli, u Bah Roykupar ula maham “Ngi ieng skhem ha ka nongrim ba lada kim lah eiei pyrshah ia kine ki iing beain wat hadien ka jinglap ia ka jingshisha na ka jingjurip, kan pynbor ia ngi ban shim ia kane ka kam hala ka kti da kaba kyndang ia kine ki briew bad lada mih kano kano ka huri hura, u Deputy Commissioner bad ka DSO kin hap shim ia ka jingbahkhlieh”.
