Nongstoiñ, Jylliew 12: Ka Myntri ka Ministry of Health & Family Welfare bad Ministry of Chemicals & Fertilizers, ka Anupriya Patel, ha ka sngi Palei, ka la hiar jurip ïa ka West Khasi Hills District ban peit bad bishar bniah ïa ka jingpyntreikam ia ki skhim ka sorkar pdeng hapoh ka district.
La pdiang burom ïa ka Myntri da u Deputy Commissioner ka District bah Garod L.S.N. Dykes ryngkat ki Additional Deputy Commissioner (ADC), ki Block Development Officer (BDO), Superintendent of Police bad ki heh sorkar na ki tnad Sorkar bapher bapher.
Ka Anupriya Patel nyngkong eh ka la leit sha ka shnong Khyllem Tiehsaw, ban jurip bad peit bniah da lade ïa ka jingpyntrei kam ïa ka Jal Jeevan Mission hapoh katei ka shnong bad pynpaw ka jingsngewkmen ba kane ka skhim ka la lah ban ai um sha man ki longïing ha ka shnong.
Ka la leit ruh ban jurip ïa ka jingpyntreikam ïa ka MGNREGS bad ka skim PMAY-G ha ka shnong Sohpian.
Hadien kane, kane lum ïa ka jingïalang ha Conference Hall jong ka ophis u Deputy Commissioner, ban pan jingkhein halor ki skhim sorkar pdeng kiba la pyntreikam hapoh West Khasi Hills District. Ïa ki jingtip kiba kala lum na kane ka jingïalang, kan sa leit rah sha Delhi khnang ba yn lah ban wanrah shuh shuh ïa ka roi ka par kaba myntoi ïa ki paidbah jong ka district.
Ka Myntri Sorkar Pdeng ka la kdew ruh ba ka Thaiñ Shatei Lam Mihngi (North East India), ka dei ka thain bala khein kongsan tam da ka Sorkar Pdeng hapoh ka jingïalam jong u Myntri Rangbah Duh ka Ri, u Narendra Modi. Ka la ong ba ka North East ka don bynta kaba khraw ha kaba ïadei bad ki kam thaw aiñ bad ha ka saiñ pyrthei jong ka ri.
Ka la ong ba la kheiñ ruh ïa kane ka thaiñ kum ka khyrdop ban rung sha South East Asia. Ha kine ki 11 tylli ki snem ba la leit noh, la sakhi ïa ka jingkylla kaba khraw ha kiba bun ki liang kynthup ïa ki surok, ka kamai kajih bad kiwei pat. Ka Sorkar Pdeng ka kwah ban ïohi ba kane thaiñ kan nang kiew shaphrang bad wanrah jingmyntoi sha ka roi ka par jong ka ri baroh kawei.
