Shillong, Lber 25 : Ka Committee on Scheduled Castes and Scheduled Tribes (SC/ST) jong ka Iingdorbar thawain ka jylla Meghalaya ha ka sngi Balang, kala leit jurip ia ka Eklavya Model Residential School (EMRS) kaba don ha Pahamsyiem, Nongpoh ban khmih ia ka jingtei bad ka jinglah ban pynsdang noh ia ka jingtreikam.
Ia kane ka jingjurip la ialam da u Chairman ka Committee uba dei ruh u MLA na Nongstoin Bah Gabriel Wahlang ha ka jingiadonlang ka dkhot Dr.Mazel Ampareen Lyngdoh bad u MLA ka Nongpoh bah Mayralborn Syiem.
Ha kane ka jingleit jurip, ki bor pynïaid skul kila pynpaw ha ka committee shaphang ki katto katne ki jingeh bad ki jingduna ha ki jingtei kiba donkam ban pynbeit khnang ban pynthikna ïa ka jingtreikam kaba suk jong ka skul. Kila pynpaw ia ka jingsngewkhia ha kaba iadei bad ka Girls’ Hostel, kaba mynta ka dang duna ha katto katne ki jingdonkam kiba kongsan.
Haba kren sha ki lad pathai khubor, u bah Wahlang ula pynpaw ba ki jingpeit bad ki jingai jingmut ba la lum ha ka por ba jurip kin pynwan ha ka kaiphod kaba bniah ban aiti sha ka Sorkar Jylla khnang ba kan leh ïa kaba donkam.
Ula ban jur ba ka jingithuh bad pynbeit ia kine ki jingeh kham kloi ka long kaba kongsan ban pynthikna ba baroh ki jaka pule EMRS kiba dang wan ha Meghalaya kin long kiba la pynkhreh ban pynbiang ia ka jinghikai kaba bha katkum ki kyndon ba la buh.
Ula kdew shuh shuh ba ki jingioh jingtip na ka Pahamsyiem EMRS kin long kum ka jinghikai ha kaban pynwandur ban kyntiew bad pynkhlain ia ki Residential School ha kylleng ka jylla.
Ka Eklavya Model Residential Schools (EMRS) ka dei ka sienjam ba kongsan jong ka Ministry of Tribal Affairs, ka sorkar India, kaba thmu ban ai ia ka jingpule kaba paka ia ki khynnah skul khamtam kiba dei ki Scheduled Tribe (ST), khamtam ha ki jaka ba jngai bad ba duna ka lad ban ioh jingshakri.
Ha Meghalaya, ka Pahamsyiem EMRS ka dei ka jaka pule kaba nyngkong eh kaba treikam pura hapoh kane ka skhim, kaba la sdang ïa ka jingpule jongka ha u bnai Nohprah 2025. Ka EMRS ka baar ha Samanda ha East Garo Hills ka la sdang treikam mar ia sdang u snem 2026.
Ka Sorkar Jylla kala pynwandur ia ka lynti kaba thmu ban pyniar ia ki jingtei jong ka pule puthi jong ki riewlum, da kaba 38 tylli ki jaka pule jong ka EMRS la mynjur ha kylleng ka Meghalaya naduh u snem 2025.
Ha ka jingbei tyngka kaban kot haduh ₹1,400 klur, ka sienjam ka wad ban seng la kumno kumno kawei ka jaka pule ia ki riewlum kaba don ym duna ia kawei ka EMRS ban pyndap ia ki jingduna ha ka pule puthi bad ki jaka sah kiba paka.
 jong ka Iingdorbar thawain ka jylla Meghalaya ha ka sngi Balang, kala leit jurip ia ka Eklavya Model Residential School (EMRS) kaba don ha Pahamsyiem, Nongpoh ban khmih ia ka jingtei bad ka jinglah ban pynsdang noh ia ka jingtreikam.){kind=link}