Shillong, Lber 24: U Lamphang ka Ïing Dorbar Thawain Thomas A Sangma hynne ka sngi Nyngkong, u la shong bishar kam halor ka jingtei iaka Iingdorbar Thaw Ain ba thymmai jong ka Jylla ha Mawdiangdiang.
Hashuwa kane, kala don ka jingleit jurip ïa ka Iingdorbar Thaw Ain ha Mawdiangdiang haka jingdon lang u Deputy Speaker Timothy D Shira, u Symbud Myntri Rangbah ka Jylla ba khmih ia ka tnat Parliamentary Affairs Bah Prestone Tynsong, ha ryngkat u Commissioner & Secretary Andrew Simons, Additional Secretary Malthus Sangma, Cyril V. Darlong Diengdoh bad kiwei kiwei.
Ha kane ka sngi la don lang ki ophisar na ki tnat bapher bapher, kynthup ïa ka tnat Public Works Department (PWD), Parliamentary Affairs Department, Design Associates bad na Assembly.
Haka jingïalang la iakren ia ka jingiaid jong ka project bad kumno ban weng ia kino kino ki jingeh kiba long mawjynthut ban pyntyllun iaki kam.
U Lamphang u la pynpaw ia ka jingsngewkmen ia kaei kaba la mih na ka jingialang, da kaba ban jur ia ka jingdonkam jong ka jingiatreilang hapdeng baroh ki nongshim bynta ban pynthikna ia ka jingpyndep ia ka Iingdorbar Thaw Ain ba thymmai ha ka por kaba biang.
