Shillong, Naitung 12 : Ka Myntri Pla Tyngka ka Ri Nirmala Sitharaman ha ka sngi Saitjain, kala leit iuhkjat ha ka shnong Laitkynsew, East KHasi Hills District bad iakren iakhana bad ki Self Help Group (SHG) bad ki Lakpati Didi, lem bad ki Farmer Producer Organisation (FPO).
Ha kane ka jingleit iuhkjat, kala pynpaw ia ka jingsngew burom ia ka jingpyrshang ba aiti lut jong ka Sorkar Meghalaya ban pyntreikam ia ki skhim ka Sorkar Pdeng bad ka Jylla ha baroh kawei ka Jylla. Kala ban jur ia ka jinglong kongsan ka roi ka par kaba kdup lang ia baroh bad ka jingpynkupbor ia ki nongshongshnong ban kynjoh ia ka thong “Sabka Saath, Sabka Vikas”.
Ka Myntri kam rep ka Jylla Kong Ampareen Lyngdoh kala iadonlang ha kane ka jingleit iuhkjat ha Laitkynsew.
Haba ai khublei ia ka Sorkar Jylla namar ka jingpdiang burom, ka Myntri kala ong ba kan mih na Jylla da ki jing kynmaw kiba khlain halor ki jingpyrshang ban rah ia ki skhim jong ka Sorkar India bad Sorkar Meghalaya sha man ki kyndong kynshrot jong kane ka Jylla kaba itynnad”.
Haba kren halor ka jingleit iuhkjat jong ka hapoh ka Aspirational District ka Ri-Bhoi bad ka jingiadon bynta ha ki jingialang bapher bapher ha Shillong, kala pynpaw ba kumno ka jingiaid lynti jong ka roi ka par ha Meghalaya ka phalang ia ka jingmut jong ka thong u Myntri Rangbah Duh ka Ri Narendra Modi halor ka Viksit Bharat (Developed India) hapoh u 2047.
Ka Sitharaman kala iaroh ia ki jingkiew sted haba phai sha ki kam ka koit ka khiah, khamtam ka jinghiar jong ka jingiap ki longkmie ba kha khun ha Meghalaya, kaba pyni dak ia ka jingkylla kaba khraw ha Jylla.
Kala ban jur ia ka bynta jong ki Self Help Group (SHG) ba wanrah ia kane ka jingkylla. Naduh u 2014, shibun ki prokram la wanrah ban kyrshan ia ki kynhun ki Kynthei da kaba nang pynsuk ba kin ioh shim ram, ai jinghikai, pynioh ia ka iew bad kiwei kiwei. Kala iaroh ia ka jingmyntoi jong ka prokram Lakhpati Didi, kaba thmu ban pynthikna ba kumba 5 ngut ki Kynthei na man ki Shnong ki dei ban ioh ia ka kamai ba T .1 lak shisnem.
Ka Myntri Pla Tyngka kala iai ban ruh ia ka jingkut jingmut jong ka Sorkar Pdeng ban kyrshan ia ka Meghalaya ha ka jingangnud ban tei ia ka ioh ka kot ba $30 billion hapoh u 20230, ka thong kaba iahap bad ka roadmap ka roi ka par jong ka ri India.
“Ban poi sha kane ka thong, man ki shnong ki hap ban synniang. Lada ka Meghalaya ka kynjoh ia kane ka thong, kan long kum ka nuksa bad nonglam lynti ia ka thong jong ka Ri ban long ka Ri kaba la roi la par hapoh u 2047” kala kdew.
Ha ka jingiakren bad ka Myntri, ka nuksa kaba khlain bha halor ka jingpynkupbor ia ki Kynthei kala wan na ka kong Lahun Mary Blah jong ka Ieng Rasong SHG, kaba la iathuh khan aba kumno ka sdang kam da ka ram ba T. 4000 ban die jain bad pynheh suki suki ia ka kam. Katba nang iaid ka por, kala nang ioh ia ka ram kaba kham heh kynthup ia ka ram ba T.10,000 ba kan sdang ia ka dukan jain bad ka T. 1 lak ka ram Community Investment Fund (CIF) na ka CLF ha u snem 2025, kaba pynlah ia ka ban plie ia ka dukan sha bad ka dukan syntiew.
 bad ki Lakpati Didi, lem bad ki Farmer Producer Organisation (FPO).){kind=link}