Hiar 46% ka jingiap ki Longkmie ba kha khun bad hiar suki ki khunlung ba iap
Shillong, Naiwieng 29 :Ka jingwad bniah kala shem ba ka flagship prokram ka Meghalaya-ka MOTHER Project kala wanrah ia ka jinghiar bun shah ha ka jingiap ki longkmie ha ka pork ha khun bad kumjuh ruh kala kyntiew ia ka koit ka khiah ki khunlung ha ka Jylla.
Kane ka jingwad bniah bala pynmih ha ka International Journal of Scientific Research and Technology, ka iathuh ba ka jing iap ki longkmie ha ka por kha khun kala jan kot mar shiteng, ka jingleit kha khun ha ki jaka sumar kala nang kiew bun shah bad ka jingsumar ia kiba kha khun kala khlain bha.
Kat kum kane ka jingwad bniah, la kdew ia hynriew tylli ki jingkdew ba kongsan ha ka koit ka khiah da kaba pyndonkam ia ki jingkhein ba ioh na ka Sorkar hapdeng u snem 2019 haduh 2024 bad ki jingiakren bad ki frontline worker na ki District bapher bapher.
Ia kane ka jingwad bniah la leh da u Sayandip Gangopadhyay, PhD Scholar, KIIT School of Public Health, KITT University, Bhubaneswar, Odisha lem bad Sudipta Das, Assistant Professor, Department of Public Health, NSHM Business School, Durgapur, West Bengal.
Ka Sorkar Meghalaya kala pynsdang treikam ia ka MOTHER Project ha u snem 2019, ka policy kaba iar bad kaba iaid kat kum ka National Health Policy, 2017 bad ka Sustainable Development Goals (SDG).
Ka projek ka pyniasoh lang ia lai tylli ki bynta jong ka koit ka khiah—ka jingïada, ka jingpynkoit, bad ka jingpynlah—lyngba ki jingpynwandur thymmai kum ka MOTHER App (ka jingbuddien ïa ka jingkha khun ha ka por ba dei), Chief Minister’s Safe Motherhood Scheme (CM-SMS) (transportation incentives), bad ki Village Health Councils (VHCs).
Kat kum kane ka jingwad bniah, ka Meghalaya Maternal Mortality Ration (MMR) kala hiar n aka 318 ngut ha u 2021 sha ka 172 ngut ha u 2024, ka jinghiar ba kot haduh 45.9%.
Ki nongwad bniah kila ainam ia ka jingtreikam bha jong ka MOTHER App, kaba lah ban buddien ia ki longkmie ba armet ha ka pork aba dei,ka Chief Minister’s Safe Motherhood Scheme (CM-SMS), kaba pynbiang ia ki kali ban kit ia ki longkmie ba suhkha, ka jingjanai ha ka jingpeitngor lyngba ki kor digital bad kiwei kiwei.
Haba phai sha ka jingiap ki Khunlung ba dang kha ne ka Infant Mortality Rate (IMR) ha Jylla, la iathuh ba ka IMR kala hiar n aka 29.9 ha u 2021 sha ka 24.4 ha u 2024, kaba pyni ia ka jinghiar ba 18.7%. Ka jingwad bniah ka ainam ia ka jingjanai ha ka rukom ai jingsumar ia ki Khunlung bad ka jingkhlain ka jingai injek ban iada ia ki jingpang bapher bapher.
