Shillong, Naiwieng 29 : Ka Mahadev Khola Welfare bad Trust kala pyrshah jur ia ka jingkam jong ki kynhun Sengbhalang ba pynman ia ka Iing ka sem u nongialap niam ba sah ha Mahadev Khola kum ki “nongshongshnong ba be-ain” haba kyrpad ruh ia ka Sorkar Jylla ban weng noh ia kane ka kyntien bad ai ka jingpynshai kaba shai kdar ia ka kyrdan jong ki.
Ha ka kyrwoh ba pynlait ha ka sngi Thohdieng, ka Trust kala ong ba ki iing ki sem kidei kiba hiar patengna u (L) Priest Shiv Narayan Mishra, kaba ki pateng jong u, kila pyndep ia ka lehniam leh rukom ba man ka sngi bad pyniaid ia ka Mahadev Temple da ki pateng. Kala ban jur ba kine ki longiing kila shong la sah ha kane ka jaka naduh shuwa ka jingioh laitluid bad hashuwa ba ka Meghalaya ruh kan ioh iala ka Jylla ba pura.
Haba niew ia ka jingpynman nongkyntur pud kum ka jingkam ka bym dei bad kaba ktah jur, ka Trust kala pynksan ba kum kine ki jingpynman ka dei ka jingkhein poh ia kine ki longiing bad ka synniang jong ki nongsumar ia kane ka Temple, haba ai ding ruh ia ka jingsngew ba pyrshah ia ki nongshongshnong bar jylla. Kala ban jur ba ka Mahadev Khola Dham ka dei ka jaka kyntang ban mane Blei, ym ka jaka ban leh politics haba maham ba kano kano ka jingpynthut ia kane ka jaka kan ktah ia ka jingsngew ki paid Hindu bad kan wanrah ïa ka jingsngewkhia halor ka hok niam.
Haba khot ia ka jingiatylli hapdeng ki jaitbynriew, ka Trust ka la ong ba kane ka kam ka dei shaphang ka hok bad ka burom na ka bynta ki longiing kiba la sumar ia ka tempi ha ki pateng bynriew. Ka la maham ba lada ka sorkar kam lah ban leh eiei, kan leit sha ka ophis jong u Myntri Rangbahduh ka Ri bad kan wad ïa ki lad ki lynti katkum ka aiñ.
Ka Trust ka la kyntu ruh ia ka sorkar ban ithuh paidbah ia ka Mahadev Khola Dham kum ka jaka leh niam kaba la rim, ban pynthikna ia ka jingshngain kaba biang, ban pynthikna ia ka jingmane Blei kaba khlem sangeh, bad ban bat ia ki hok jong ka riti synshar jong baroh ki nongshong shnong.
