Shillong, Naitung 27 : U Symbud Myntri Rangbah ka Jylla Bah Prestone Tynsong ula ong ba hato u Dr Mukul Sangma uba la dei teng u Myntri Rangbah ka Jylla u mut ong ba ula pyndonkam ia ka Tnad Pulit ban myntoi ialade namar lada u leh, kan long kaba sngewsih jur.
U Bah Prestone ula kynthoh ia kane haba jubab ia ka jingkynnoh u Dr Mukul Sangma ba ki Pulit ka West Garo Hills kila kylla long ki atiar jong ki Heh sain hima sima kiba don ha ka bor.
U Dr Mukul ula kynthoh ia kane halor ka jingkem ki Pulit ia u Nongialam ka TMC Youth Wing Richard Marak namar ka jing kynnoh ba u donkti hakhmat eh ban kynshoit ia ki paidbah ba kin hiarthma ia ka Chief Minister Office (CMO) ha Tura, katba ka dang iaid ka jingialang hapdeng u Myntri Rangbah ka Jylla bad ki Sengbhalang.
“Ka Tnad Meghalaya Police ka don ban ai jingiada ia baroh ki paid nongshongshnong ka Jylla ym tang ban ai jingiada ia u Myntri Rangbah ka Jylla ne u Symbud Myntri Rangbah ka Jylla” ong u Bah Prestone haba iakren bad ki nongthoh khubor.
Une u Symbud Myntri Rangbah ba khmih ia ka Tnad kam Pohiing (Police) ula ong, “Hato u Dr Mukul Sangma uba la bat teng kum u Myntri Rangbah ka Jylla u pyrshang ban iathuh ia ki paidbah ba ula pyndonkam ia ka Tnad Pulit na ka bynta ka jingmyntoi shimet”.
“Nga tharai, u (Dr Mukul) la don ha ka shuki Myntri Rangbah la paalt 7-8 snem. Haba u kren ha kane ka rukom, hato u mu tong ba ha ka por jong u kum u Myntri Rangbah ka Meghalaya, ula pyndonkam ia ki Heh Pulit na ka bynta ka jingmyntoi alade? Lada ka long kumta, ka long kaba sngewsih jur” buh jingkylli u Bah Prestone ia u Dr Mukul.
U Symbud Myntri Rangbah ula ong ruh ba ka Sorkar Jylla bad ka Tnad Pulit ki don hangne ban ai jingiada ia ka bha ka miat jong u paidbah nongshongshnong ka Jylla.
“Ngi don hangne la ka dei u Myntri Rangbah ne dei u Symbud Myntri Rangbah ne dei mano manor uh, ngi don hangne ym ban iada ialade hynrei iaki Nongshongshnong jong ka Jylla” ula bynrap.
