Guwahati, Oct 24: Katba ka jingtohkit ka dang iaid sha khmat halor ka jingiap ba phyla u nongrwai ba pawnam ka Assam u Zubeen Garg, mynta ka poi sha ka bynta ba kongsan ha kaba ki bor ba dei khmih na Singapore kila mynjur ban kner ia ka jingiarap da kaba kin ai ia ki sakhi sha ki Pulit Assam.
Haba kren sha ki lad pathai khubor ha ka sngi Palei, u Additional Director General of Police u Munna Prasad Gupta u la ong ba ka Special Investigation Team (SIT) kaba tohkit ia kane ka case kala shong jingialang bad ki high level ha Singapore bad ki dkhot ba san ngut ka kynhun ki pulit Singapore.
“Ka jingïalang ka la long kaba seisoh.Ki bor ba dei khmih na Singapore ki la pynthikna ïa ka jingïatreilang kaba pura, kynthup ïa ka jingpynpoi (transfers) ïa ki kot ki sla ba thikna bad ka forensic report lyngba ki lynti jong ka aiñ,” ong u Gupta.
Ia ka post-mortem report na Singapore yn sa aiti lyngba ka Indian High Commission, u la bynrap. Ha kane ka jingleit jngoh jong ki, ki ophisar ka SIT ki la jurip ruh ïa ki jaka kiba ïadei bad kane ka jingjia bad ki la lum ïa ki sakhi kiba kongsan ban pynkhlain ïa ka jingtohkit.
Shuh shuh u Gupta u la pyntip ba ki dkhot jong ka SIT kin s alum ia ki dur khih jong ka CCTV bad kin record ia ki statements ne ka jingkynthoh na baroh ki briew kiba sakhi hapoh ka 10 sngi.Ka Statements na ki nong Singapore yn sa shim beit da ki pulit ka Singapore, bad ia kaba la khmih lynti ba kin aiti ia ka report hapoh 90 sngi.Ia kane ka report yn sa ai sha ki pulit jong ka Assam na ka bynta ban buddien lyngba ka judicial procedures.
Ha kawei na ki jinglap ba khraw, u Gupta u la pyntikna ba la lap ia ka jingthranfer pisa sha ki bank account jong ki ar ngut ki Personal Security Officers (PSOs) jong u Zubeen Garg, Paresh Baishya bad u Nandeswar Bora. “Kine ki kam ki hap hapoh jong ka Prevention of Corruption Act, namar ba ki paw ba ki donkti bad ki mar ki bym ïahap.Ïa kane ka kam la tohkit da ka kynhun Chief Minister’s Vigilance team,” u la ong.
Kumba long haduh mynta kila don haduh 70 ngut ki briew kiba la shah kylli jingkylli ha ka kynhun SIT ha kaba iadei bad kane ka case. Gupta u la pynpaw ruh ba ki dkhot jong ka jaitbynriew Assamese ha Singapore, kiba ïasoh bad ka Assam Association, ki lah ban shah khot biang na ka bynta ki jingkynthoh ne ka statement ba kham bniah lada donkam.
