Shillong, Nailur 24: U Superintendent of Police (SP) ka East Khasi Hills bah Sylvester Nongtnger u la ong ba wat hapdeng ka jingnang kiew ka kam khaii ia u droks ha East Khasi Hills, ki pulit ki khlem shong kli kti satia ha ka jingiakhun pyrshah ia ki kam bymman ba mih na u droks hapoh ka District.
Haba iakren bad ki nongthoh khubor ha ka sngi Ba-ar, une u SP ula kyntait ia ki jingkynnoh ba ki bor ka Ain kim shym la shimkhia eiei ruh halor ka kam khaii droks hapoh ka District
Kat kum ka jingong jong u, ki Pulit kila pyni ia ka jinglah treikam ha ka jingiakhun pyrshah ia ka kam khaii droks ha kine ki snem bala leit noh. Ha u snem 2019, haduh 52 tylli ki case la register kaba lam sha ka jingiohkem ia 92 ngut ki briew. Ha u 2020- ki don 28 tylli ki case bad la kem 45 ngut, ha u 2021 la don 71 tylli ki case bad 48 ngut kila shah kem bad kala don ka jingkiew ha u 2022 ha kaba kila don haduh 46 tylli ki case bad la kem ia 114 ngut.
Kane ka iai bteng ha u snem 2023 ha kaba kala don haduh 71 tylli ki case bala register bad la kem haduh 133 ngut ki briew. Mynta u snem 2024 kat haduh u bnai Nailar, kila don 27 tylli ki case bala register bad la kem haduh 53 ngut ki briew.
U SP ula pyntip ba hapdeng u snem 2019 haduh u Iaiong 2024, kila don haduh 250 tylli ki case bala register, kaba lam sha ka jingkem briew haduh 485 ngut. Ki Pulit kila kem ia bun bah ki jingdih buaid ha kine ki snem kynthup ia palat shiteng ton u ganja, palat 2 kilo u opium, yaba tablet bad kiwei kiwei ki jingdih.
Haba kylli u SP u la iathuh ba napdeng kiba shah kem, kiba bun ki dei ki nongkhaïi bad don lang ruh kiba dih ia ki drug haba pyntip ba bun na kitei ki case ki dei kiba la dep ban chargesheet bad ki don ruh kiba la iaid ka jingbishar mukotduma.
U Bah Nongtnger u la kyntait ruh ia ka jingkynnoh ba ki Pulit kila kem tang ia ki nongdie khutia ia u drug, da kaba ong ba ka thong jong ki pulit ka long ban kem ia ki nongkhaïi kiba heh, kiba treikam na sha lyndet.
Halor ka jingpynjulor ia u droks ba ioh kurup, une u Heh Pulit u iathuh ba ka Sorkar kala thaw ia ka Drugs Disposal Committee, kaba la pynkhamti ia ka bor ban pynjulor ia ki drug ba la ioh kurup. Ia u droks la pynjulor da kaba thang ha ka jaka ba la buh da ka Sorkar ha Lumshnong bad la ju leh ia kane kumba ar ne lai sien ha ka shisnem hadien bala dep tian bishar ka Iingkashari.
