Shillong, Risaw 06 : U Deputy Commissioner ka West Garo Hills Vibhor Agarwal ula pynbna ba ki kam ban siew ia ka tulop ba 12 bnai na ka 43 bnai, kaba sahteng jong ki nongtrei ka GHADC, yn sa pyndep noh hapoh ka 15 tarik Risaw.
U Aggarwal ula pyntip ia kane ha ka jingialang hapdeng ka Sub-Committee, ki Nongtrei ka Garo Hills Autonomous District Council (GHADC) bad ki dkhot ka Non-Gazetted Employees Association (NGEA) ba long ha ka sngi Nyngkong.
Ka jingialang kala iakren halor ka jingpynkhreh bad ka jingiaid jong ka kam ban siew noh ia ka tulop ba 12 bnai jong ki nongtrei ka GHADC, kumba la mynjur da ka Kynhun Myntri ka Sorkar.
Ha ka jingialang, ka Sub Committee kala ai ia ka jingbatai kaba bniah ia ka rukom pyllait ia ka tulop, haba batai ia ki sienjam kiba la shim ban pynthikna ba ka jingpyllait ia ka tulop kan dep hapoh ka 15 tarik Risaw.
Ki Ophisar ka GHADC kila pyntip ba ka jingpynkhreh kala iaid shaid shaid ha kaban shna ia ka statement siew tulop bad ki jingpynbiang ia ki kot ki sla ban lah pyllait noh ia ka pisa.
Haba ai jingkren, u Deputy Committee ula ong ba ka jingthmu jong kane ka jingialang ka long ban shong bishar kamhalor ka jingpynkhreh jong ka GHADC bad ban pynthikna ba ka jingpyllait ia ka tulop kan long kaba iaid beit iaid ryntih.
Ha kajuh ka por, u President ka NGEA Britein Sangma ula pyntip sha ki lad pathai khubor ba watla ka Seng kam pat hun pura ba ka ioh tang 12 bnai ka tulop, hynrei kala mynjur ban pdiang pat ia ka. Hynrei, ula pynshai ba ki nongtrei kim pat mynjur ne ai jingmynjur haba iadei bad ka jingsiew ia ka tulop ba tista, kaba la buh ban ai naduh ka 1 tarik Naiwieng da ka Sorkar Jylla, namar kim pat tip shai halor ka tyllong jong ka pisa ne pat ioh da ka jingthoh.
Ula ong ba ka NGEA kan iaid kat kum ka rai lang jong ki paidbah ka ri-lum Garo haba iadei bad ka jingpdiang ia ka tulop ba man la u bnai, naba kane ka kam kala dei ka kam ba sngewkhia da ki paidbah.
