Tura, Nohprah 7: Watla kala don ka jingslap hynne ka sngi, hynrei u Myntri ka tnad Jngohkai u Bah Paul Lyngdoh ula plie pyrda ia ka Me’gong Festival ha Jengjal-Baljek kaba don ha West Garo Hills.
Kane ka jingslap kynsan kaba la neh palat iaka 24 kynta, kala pynthud iaka jingthrang jong ki paidbah na kylleng ka rilum Garo ban iashimbynta ha katei ka tamasa khamtam eh ha ka ban ioh sakhi ia ka kynhun tem kaba pawnam jong ka ri India ka ‘Parikrama’ ba kan pynshongshit ia ki paidbah ha ka tamasa.
Watla katta ruh, la sakhi ba ha katei ka tamasa, kito ki bym shim la salia ia u slap kila iaid shakhmat ha kaban plie ia ki dukan bam ki jongki ha kaba kila die iaki jingbam tynrai jong ki riewlum Garo, ki jingbam bad ki jingdih ki bapher bapher ban pynsyaid bad pynshongshit ban ioh lehkmen ha ka tamasa.
Kala don ruh ka jingpyninam ia ki tiar ki tar kiba la suh ne thain hi da ki kti, ia kaba ki paidbah ki lah ban thied bad ban buhkai ha ki iing ki sem jong ki.
Ka Jengjal-Baljek ka jngai kumba 32 Km na ka Tura, West Garo Hills.
Ka Baljek Airport ha Jengjal (kaba tip kum ka Jengjal-Baljek), kaba shen kan sa sdang ban treikam noh, kadei ka jaka kaba la pynlong ia katei ka tamasa baddang shen la pynlong ruh ia ka Shad Wangala ha katei ka jaka.
Ka Tura kaba dei ka nongbah jong ka West Garo Hills District kam lah ban pynlong ia ki tamasa kiba lah ban ngiam da ki hajar ngut ki paidbah na kylleng ki thaiñ bad kumta ka Jengjal kala kylla long kumka jaka kaba biang tam ban lum ia ki paidbah na kylleng bad khlem da don ruh ia kano kano ka jingpyrwa jong ka jingdheng kali ne kiwei kiwei ki jingeh.
Watla ka sngi nyngkong jong ka tamasa kala shah pynthud noh ha u slap, ki nongrwai bad ki kynhun kiba ei ban rwai mynne ka sngi kin pynshongshit ia ki paidbah ha ka Sngi Thohdieng bad Sngi Saitjaiñ.
Ha ka janmiet jong ka Sngi Saitjaiñ kan dei ka sngi kaban khring ia ki paidbah na kylleng ki jaka ban wan peit iaka kynhun kaba pawnam ha ka pyrthei ka ‘Vengaboys’ ba kan pynshongshit ia ki paidbah ha kane ka sngi kut jong ka tamasa.
