Shillong, Nohprah 07: Ka seng saiñ pyrthei Khun Hynniewtrep National Awakening Movement (KHNAM) kala kynnoh ba ka Harijan Panchayat Committee (HPC) kala shimkabu ia ka jingiakren bad ka Sorkar Jylla ban pynkynriah ia ka Them Metor na Them Iew Mawlong, kaba la iaid mynta la 6 snem.
“Ka jingiaid lynti kane ka kam (jingiakren) ban pynkynriah ia ki Harijan na Them Ïew Mawlong sha ka jaka lane ki Quarter ba thymmai kala iaid sha ki 6 snem bad kumba paw hi, la iohi kumba ka HPC ka la shimkabu ban myntoi katba lah na kane ka jingiakren” ong u Working President ka KHNAM Bah Thomas Passah lyngba ka kyrwoh khubor.
Une u nongialam ka KHNAM ula buh jingkylli iaka sorkar jylla da kaba ong “Ka Sorkar kala rai ban ai haduh 3.6 akar ka jaka sha ki Harijan, hynrei ka jingkylli kaba mih, ka long kane ka jingai jaka kam pynkhieñ pat ia ka Land Transfer Act jong ka Jylla ka jong ngi?
Ula ong ba ki paidbah ki dei ban ioh jingshai na ka Sorkar ba kane ka jaka 3.6 akar kan dei noh jong ki Harijan ne kan dang dei jong ka Sorkar bad lada ia kane ka jaka yn ai noh sha ki Harijan, ka mut ba ka sorkar hi ka pynkhieñ ia ka aiñ lajong.
“Katkum ka Inventory Report ba la pynkhreh da ka Shillong Municipal Board la batai ba kiba trei lane kita kiba dei ki nongtrei ka SMB ki don 184 longiing bad kiwei ki dei kiba sah be-aiñ. Ka jingkylli kaba mih, ka long ba mynta pat la batai da ka Sorkar ba ki don haduh 342 longiing ki ban hap ban ai jaka bad wat ban pynshna iing ei ia ki ruh da ka pisa u paidbah” ong u Bah Passah.
Ula ong ba ka sorkar kadei ban pyntip paidbah kiei kita ki 342 ngut bad ki trei haei bad ban ai jaka pat ia kiba shu shong be-aiñ kan ialam sha ka jingmlieñ kaba bakla.
Peit lang ia kane
