Nongstoiñ, Naiwieng 17: Ki nongrep kiba na ki shnong bapher bapher jong ka West Khasi Hills, ki la jaw ummat brub namar hapdeng ka aiom kaba kmen ban ioh lum ioh lang ia u kba u khaw, hynrei u ‘lapbah hynnin ka sngi palei u la ther ha ki katto katne ki bynta jong ka District, kat haduh ba ki don bun jaka kiba u kba u la jhieh lut.
Kawei na ki shnong ba ioh ia u lapbah ka dei ka Tiehbah Nongstoiñ, kat haduh ba ki nongrep ki la ud la nam na ka daw ka jingduhnong kaba jur hadien ba ka um ka la kit lut ia baroh ïa u Kba bad bun ruh ba la shu per ha sla um.
Kane ka jinghap slap kyndit ka la jia ha ka por noh phai sngi ha ka por ba ki nongrep ki dang ot, dang lum ia u kba ha ki pynthor kiba don ha katei ka shnong. La ong ba ha Tiehbah u Kba u ba dang shu dep ot bad u ba la lum shi jaka satang ban shoh u la shu shah kit noh ha ka um. La ong ruh ba ka jingduhnong la shu antad ba uwei uwei u trai pynthor u duh palat ïa ka 15 hajar ei ei.
Ki trai Kba ha Tiehbah kiba shah ktah ki kynthup ïa ka jong u bah Branli Marweiñ, bah Tholing Kharlyngdoh, kong Ispilian Mawlieh, Eldaris Thongni bad kiwei kiwei ruh. Nalor nangta ha kiwei kiwei ki shnong ba marjan ruh ka la don ka jingjulor jur tangba haduh ba thoh ia kane ka khubor, ym pat lah satia ban ioh jingkhein ne jingtip kaba bniah.
