Aizawl, Naiwieng 17 : Ka Young Mizo Association bad kiwei ki Senghalang lem bad ka Village Council, kila ai bam, ai jain bad ai dawai ia palat 5000 ngut ki phetwir ka Myanmar kiba wan poi riehtngen mynta ha ka shnong Zokhawthar, kaba don ha khappud Myanmar.
Hadien ka jingther bomb biang ki liengsuin iapom jong ki shipai Myanmar ha ki shnong khappud ka India-Myanmar, palat 5000 ngut ki nong Myanmar kila kylla phetwir bad poi wan riehtngen tang ha Zokhawthar kaba hap hapoh ka Champhai District.
Kat kum ka jingiathuh u Finance Secretary ka YMA F Biaktinsanga, ka jingwan poi ki phetwir kala kot bun hajar sha India na Mynamar. Ia kine ki briew la kyrshan da ki seng bapher bapher nalor ki bor District, kiba la ai ruh ia ki marbam, aijain bad ki dawai dashin.
“Ki Seng bad ki Nongshongshong kila ai bam ai jain ia kine ki phetwir. Ki bor District bad u Myntri Sorkar ruhkila wan ban iarap ia kineki nong Myanmar kat ia kaba ki donkam. Kila im suk im sain hangne. Ngi sngewieid ia ki bad kaei ka jingeh kaba ki don, ngi ioh ia ka jingiarap na ka YMA” ula ong.
U iathuh ruh ba ki don bun ki Khyllung Khynnah bad ki Kynthei ha kane ka jaka sah bala pynkhreh shipor ia ki bad kai seng kila pynbiang ia kine ki khynnah da ki cerelac, ka dud, bad katto katne ki vitamin. U iathuh ba kila pynbiang ruh wat ia ki diaper (napkin) bad ki jain ia ki Khyllung khynnah namar ba kim shym la rah eiei ha ka por ba ki phet nala ka jong ka Ri.
