Shillong, Iaiong 29 : Ki bor Pulit ka Jylla bad ka kynhun ki CRPF kila hap ban mih noh na phyllaw ka NEHU, Shillong Campus ha ka miet sngi Nyngkong, kaba long hadien lai kynta ka thma nia kaba jur hapdeng ki samla pule bad ki Pulit bad kumjuh ruh halor ka jingkyrpad jong ka Acting Vice Chancellor sha ka DGP ban weng ia ki bor pahara na Campus.
Ki bor pahara kila mih noh na campus jong ka NEHU ha ka por 10:30 baje mynmiet.
Shuwa kane, ka NEHU Students’ Union (NEHUSU) kala khang khyrdep ia ka khyrdop jong ka skulbah haduh 3 kynta, naduh ka por 6 baje janmiet haduh 9 baje janmiet haba dawa ban weng noh mardor ia ki borPulit bad CRPF na Campud.
Hapdeng kane ka por, ym shym la shah satia ia ki kali ba kin iaid la ki dei kiba rung ne kiba mih, kaba lam sha ka jingieng lain kaba jrong bha jong ki kali.
Ha kajuh ka por, da ki spah ngut ki samla pule kila ieng ha khyrdop Gate No 2 bad iasaid nia bad ki Pulit lem bad ki Magistrate, haba dawa ia ki ba kin mih noh mardor na campus.
Kila buh jingkylli halor ka jingwanrah haduh 150 ngut ki bor Pulit shapoh ka campus.
Da ka jingkyrngah ki Pulit ban mih, ki samla pule kila pynbna ban sangeh ia ka jingleit shong klas ba khlem pud, ka ban sdang naduh mynta ka sngi Ba-ar bad rai ban iashong paidbah ha khyrdop jong ka skulbah katba ki bor pahara ki dang don hapoh ka campus.
Ka jinglong jingman hapoh NEHU kala thnem bha ha ka sngi Nyngkong hadien ba ki Pulit kila kem ia u President ka NEHUSU Sandy Sohtun ha ka por mynstep halor ka jingkynnoh ba u donkti ha ka jingshoh ia u Dr Alok Singh, u Assistant Professor kaTnad Hindi hapoh ka kamra treikam jong u myn ha ka 24 tarik Iaiong.
Hynrei, hadien ka jingiania kaba la neh slem bha bad ka shithi jong ka Acting Vice Chancellor sha ka DGP, kane ka khlieh duh ki Pulit kala weng noh ia ki bor pahara.
Kat kum ka khubor, ia kine ki bor pahara la buh mynta ha Mawkynroh Police Outpost.
Haba pynthikna ia kane ka jingweng noh ia ki bor pahara, u Superintendent of Police Bah Vivek Syiem ula ong ba ia ki bor Pulit la weng noh na campud kat kum ka jingkyrpad jong ka Acting Vice Chancellor.
