Shillong, April 28: Ka jingialang ne Conclave ban jied ia u Pope bathymmai kan sdang ha ka 7 tarik u Jymmang, ia kane la pynbna da ka ophis jongka Holy See Press ha ka sngi Nyngkong.
Ia kane ka jingialang yn pynlong na ka bynta ban Vote ban rai ia ka lawei jong ka Roman Catholic Church hadien ka jingkhlad noh jong u Pope Francis ha ka taiew bala dep ha ka rta kaba 88 snem.
Ia kane ka rai la shim ha ka General Congregation kaba san jong ki Cardinal kiba don mynta ha Rome. Kumba 180 ngut ki cardinal kila iashimbynta ha ka jingialang, ha kaba kila mynjur ia ka tarik ban sdang ia katei ka jingialang kaba long kongsan ha ka histori.
Ia kane ka jingialang yn pynlong hapoh jongka Sistine Chapel ha Vatican, ia kaba yn khang ia ki nongleitkai ban rung katba dang iaid katei ka jingialang.
Hadien ka jingbuh ia katei ka tarik, ki Cardinal kin ioh por shi taiew bad iakren bad phylliew jingmut ban thaw ia ki kynhun bad ban khmih bniah ia ki kyrtong kiba hakhmat bha. Ki katto katne kiban don ha ka jingiakhun, la khmih lynti ba kin ialap halor ki nongrim jongu Pope Francis ha kaba iadei bad ka Pastoral bad ka rukom iaid kaba long kyllum, katba kiwei pat ki lah ban mynjur da kaba leit phai biang sha rukom treikam kaba rim bad tynrai na ka bynta ka Balang Catholic.
Ki Cardinal kin iakynduh ha ka step jongka sngi Baar, ban ialap bad la khmih lynti ba ki jingiatai ban kin nang jur ha ki sngi kiban nang wan haduh shwa ban pynlong ia ka jingialang ne Conclave.
