Shillong, K’lyngkot 31 : Ki Pulit ka East Garo Hills kila pynlong ia ka jingkhynra kaba jur ha kawei ka khlaw jong ka Bolkingre, kaba don shiliang ka wah Simsang hadien ka jingiohi ia ka jinghap ka tiar phylla bad ka parachute najrong suin.
Ki Pulit ka Anti Insurgency Operation Camp kaba don ha Bolkinggre, kila ioh jingtip ha ka 30 tarik Kyllalyngkot ha ka por 9 baje mynmiet, ba don ka jinghap kawei ka kynja tiar najrong suin ha kane ka khlaw bad ia kane ka tiar la shem ba ka don ha ka shnong Asiragre, kaba hap hapoh ka Williamnagar Police Station.
Ka kynhun ki Pulit lem bad ki Bomb Squad kila hiar wut wut sha katei ka jaka ban pynlong ia ka jingtohkit.
Kane ka jaka ba hap kane ka tiar ka dei ka ktem jong ki kam kaikhlaw bad shibun bah ki tiar pynbthei bad ki tiar siat la ioh ban kurup na kane ka thain.
Ha ka jingtohkit, la sshem ba ha ka janmiet 29 tarik Kyllalyngkot ha ka por 6:30 baje eiei, uwei u nongshongshnong ka Asiragre ba kyrteng u Silnang R Marak, ula lap ia kane ka tiar na kper jong ka Iing ba u sah bad ula buh noh hapoh Iing.
Ki Pulit haba tohkit kila shem ba u dei u “meteomodem PS-20” bala shna ha France bad ia uba la pyndait lang bad ka parachute rong saw.
Ki Pulit kila kurup noh ia kane ka tiar PS-20 bad hadien la shem ba kane ka tiar ka dei ka GPS kaba thew ia ka jingkhlain ka lyer ha suinbneng.
Ki Pulit ka East Garo Hills kila kyntu ia ki nongshongshnong ba kin ym sheptieng halor kane ka jingshem ia kane ka tiar.
