Shillong, K’lyngkot 15 : Arngut ki briew kila iap hashen bad arngut kila mynsaw jur haba ka Tata Sumo ba ki iashong, kala hap shapoh ka riat ba jylliew bha hajan ka Ratachera Police Check Post, NH-6, East Jaintia Hills.
Kane ka jingjia kala jia hynne ka sngi Balang bad la pyntip ba kane ka Tata Sumo ka dei kaba mih na Guwahati ban leit sha Silchar bad ki don 4 ngut ki briew ha kane ka kali kynthup ia u Nongniah.
Kine kiba iap ki kynthup ia u Nongniah bad kawei ka passenger kynthei. Kiba mynsaw ruh ki dei ki passenger kynthei.
Ki shipai BSF ka 172 Bn, haba iohi ia kane ka jingjia, kila hiar wut wut sha kane ka riat bad kila ioh sei ia kiba mynsaw ban pynkit sha ka Primary Health Centre (PHC) ba marjan hashuwa ban pynkynriah ia ki sha Silchar Civil Hospital bakin ioh ia ka jingsumar ba kham paka.
