Shillong, Nailar 29 : Ka Meghalaya Institute of Governance (MIG), jong ka sorkar jylla ryngkat ka jingiatreilang bad ka Department of Economics, North Eastern Hill University (NEHU hynne ka sngi ka la pynlong ia ka jingiatai ba shisngi halor ka phang -“Strengthening the Finances and Financial Accountability of Autonomous District Councils in Meghalaya”ha ka jingialang kaba long ha State Convention Centre, Shillong.
Kane kadei ka sien ba nyngkong ka jingpyrshang ban wallam lang ia ki nongialam jong ki Autonomous District Council bad ruh na ka sorkar jylla ryngkat ki riewshemphang ban iatai halor katei ka phang.
Ha kane la donlang ruh u Bah Lahkmen Rymbui Myntri ka tnad District Council Affairs ka sorkar jylla kum u Symbud Kongsan bad ruh u Bah Titosstarwell Chyne, Chief Executive Member, KHADC kum u Symbud Kongsan.
Ha ka jingkren u Bah Lahkmen u la kdew halor ka jingdonkam ban buh jingkhein ha kane ka juk mynta bad ong ruh ba ka long kaba kham Kongsan na ka bynta ki District Council ha ka jylla ba kin shim ia katei ka sienjam ban buh bad lum jingkhein da kaba iaid ryngkat ryngkat katkum ki polisi bad ki kyndon lum jingkhein (financial rules) jong ka sorkar.
“Ha kane ka juk jong ki kor ki bor, ki rukom ba thymmai ban pynbiang ia ka khein ka diah la leh bad pynbeit hi da ki kor ki bor ha kaba ka accounting wing jong ki District Council ki hap ban pyndonkam katkum ka por,” u la ong.
Ka phang pdeng jong katei ka prokram ka long ban pynshai ia ki nongmihkhmat na ki ADC, na ka sorkar jylla bad ruh ia ki nongmihkhmat jong ki shnong halor ki sienjam ba la pyntreikam da ki Rur Bodies ha ka Ri ban pynkhlaiñ ia ka rukom buh jingkhein jingdiah bad ruh ban ia kren halor ka pla tyngka bad ki jingeh jong ki Council bad ki sienjam ba donkam ban pynbeit ban kyntiew ia ka rukom treikam kaba beit bad ka jingkhein kaba biang jong ki Council.
Kiba donlang ha katei ka jingialang ki kynthup ia u Prof. V. N Alok, IIPA New Delhi, Prof Sumarlin Umdor, Department of Economics, NEHU bad u Bah Tornado G. Wanniang, Sr. Audit Officer & Core Faculty, Regional Training Institute (IA & AD), Shillong.
