Itanagar, Nailar 20 : Da ki hajar ngut ki paid riewngeit Khristan na ki balang bapher bapher kila wan iashim bynta ha ka rally paidbah ba la khot pynlong da ka Arunachal Christian Forum (ACF) hynnin ka sngi Thohdieng ban dawa halor ka hok ban tei iingmane ha Tawang.
Haba kren sha ki lad pathai khubor, u president ka ACF u Toko Teki u la ong, “Ngi kyrmen bad ka sorkar kan shim ia ki sienjam ban weng mardor ia kane ka jingeh.Ki paid riewngeit kim shym la tam pud sha ki jaka jong ki riew shimet, kumta ruh ka sorkar ka dei ban pdiang ia ka rai jong ka bad ban shah ia ki paid Khristan ba kin tei ia ka iingmane.
Ula ong ruh ba ka kaiphot jong ki laingut ki dkhot ka Committee ka la don tang sha kawei ka liang.Haba kren halor kane, u Vice President ka ACF, u Norbu Sonam ula ong ba kim shym la pyrshah ia ki riewngeit Buddhist lane ia ki nongshong shnong kiba dei ki jaitbynriew Monpa, hynrei kila dawa tang ia ka hok ka jong ki.
Ki katto katne ki briew ha kane ka thain kila pyrshang ban shim ia kane ka jingialang kum ka kam ialeh pyrshah niam hapdeng ki Khristan bad ki Buddhist, kaba long ka jingialam bakla.Nalor kata u la kynthoh ruh ia baroh ki arngut ki MP ka East bad West halor ka jingsngap jar halor kane ka bynta.
Nalor kata ula ong ruh ba kila pyrshang ban iakynduh ia u Myntri Rangbah (CM) la bun bunsien, hynrei haduh mynta um shym la pynsngap ha kaba iadei bad kane ka jingdawa ka jong ki.
“Lada kane ka jingleh pyrshah ia ki nongshong shnong kiba dei ki Khristan kan dang iai bteng, kumta ruh kan ym slem ba ka jylla kan sakhi ia ki jingiakhih kiba tyngeh,” ong u Sonam.
Haba pynshong nongrim katkum ka kaiphot na ka jingwad bniah, u Khyoda Apik uba dei u Chief Advisor abd u president barim ka ACF ula ong ba katei ka Committee ka la pynshong nongrim lyngba ka hukum jong ka iingbishar Supreme Court na ka bynta ban khanglad halor ka jingthmu ban tei ia ka iingmane ha Tawang.
Hynrei, na ka liang ka SC kala pynpaw pat ba kino kino ki jaka mane blei kiba don ha ki jaka paidbah dei ban pynkynriah noh, hynrei ka iingmane ha Tawang kam shym la don ha ka jaka paidbah.Lada ka committee ka kwah ban khanglad ia ka jingtei iingmane, kumta ruh ka dei ban pyntreikam kumjuh ia ki kyndon ka SC, kata ban pynkynriah ia baroh ki temple, ki jingtei niam, ki mosque bad ki Gurudwara kiba don ha ki jaka paidbah, ong shuh shuh utei u heh ka ACF.
“Ngi la shah ia ki nongshong shnong kiba dei ki Buddhist ba kin tei ia ki jingtei niam ha ki jaka hapoh ka nongbah, hynrei kim shym la don ki riewngeit Buddhist, te balei ba ki briew kin pyrshah haba ki paid Khristan ki kwah ban tei ia ka iingmane ha Tawang,” ong shuh shuh u Apik.
