Itanagar, Risaw 30: Ka sorkar Arunachal Pradesh kala shim ia ka rai ban weng bad sospon ia ki sawngut ki dkhot jong ka Arunachal Pradesh Public Service Commission (APPSC) ha ka sngi Palei ba la lah, kata ar bnai hadien ka khubor ka jinglaittuh ki jingkylli na ka bynta ka eksam pynrung kam, ong ka khubor heh sorkar.
Ka sorkar jylla hadien ka jingbthah jong u myntri rangbah (CM) ka jylla u Pema Khandu kala aiti ia ka jingtohkit ia kane ka jingjia sha ka tnat Central Bureau of Investigation (CBI), kaba la register case, katba ka kynhun na kane ka tnat tohkit hapoh ka jingialam jong u joint director mynta kila wan poi ha Itanagar.
Hadien ka jingialang jong ka kynhun myntri ba la pyniaid da u CM Khandu, na ka liang ka sorkar kala aiti ia ka jingmymjur jong ka kynhun myntri sha u Lat ka jylla u Brig (Dr) B.D. Mishra (Retd) ban pynjari ia ka Article 317 na ka bynta ban weng ia ki sawngut ki dkhot jong APPSC kaba pyniaid ia katei ka eksam na ka bynta ka post Assistant Engineer (Civil).
Na ka liang u CM Khandu ila ong ba ka sorkar jylla kala kut jingmut ban shim ia ki sienjam ban pynkhuid bad pynkut noh ia kine ki kynrum kynram kiba don hapoh ka APPSC na ka bynta ka bha ka miat jong ki paid nongshong shnong ka jylla hi baroh kawei.
Ka sorkar jylla naduh ka sngi kaba nyngkong kala pynpaw shai kdar na ka bynta ban pynkhuid ia ka APPSC bad ban pynlong ia ki eksam ha ka rukom kaba khuid bad ba laitluid, ong u Khandu.
Haduh mynta shiphew ngut ki briew kaba kynthup ia u deputy secretary cum deputy controller of examination ka kila shah kem noh ha ki bor pulit ka jylla halor ka jingshah kynnoh donkti ha kaba iadei bad katei ka jinglaittuh jingkylli.
Na ka liang u Chairman jong ka Commission u Nipo Nabam ula iehnoh kam ha ka 14 tarik mynta u bnai shibynta ban pynpaw la jingkitkhlieh halor ki jingleh bakla da ki ophisar jong ka commission ki bym shym la lah ban pynneh ia ki jingtreikam ba buhrieh bad ban khanglad ia ka jinglaittuh ki jingkylli.
Kiba bun ki kynhun seng, kaba kynthup ia ka Anti-Corruption Foundation, kila dawa ban sospon mardor ia u chairmam, secretary ka APPSC lem bad kiwei pat ki heh sorkar ha kaba iadei bad kane ka jinglaittuh ki jingkylli hashwa ban ka jingpynlong ba dang shen ia ka eksam na ka bynta ka post Assistant Engineer (Civil).Nalor kata kila dawa ruh ban pynlong da ka jingtohkit kaba laitluid.
Ha ka 28 tarik u Nailar ba la dep uwei u nongiakhun ia kane ka eksam ula ujor da ka FIR hapoh Itanagar police station, da kaba ujor pyrshah ba ki jingkylli na ka bynta ka eksam ba la pyniaid da ka APPSC kaba la long ha ka 26 bad 27 tarik u Nailar ba la dep kila laittuh.
