Shillong, Jymmang 06: The Khasi Students’ Union (KSU) South Central Circle hynne ka sngi saitjain kala kala pynbna ban pynlong daka jingiakhih daka ba iaid paidbah haka 8 tarik mynta u bnai ban pyrshah halor ka jingshah siat iap u rangbah na Laitlyngkot bala tip kyrteng kum u Roning Nongkynrih ba 35 snem, ha ki shipai Border Security Force (BSF).
“Kum shi bynta ban pynrem jur ia kane ka jingleh riewkhlaw ki shipai BSF, ka KSU kan pynlong daka jingiakhih paidbah haka 8 tarik mynta u bnai ban dawa pynshitom jur ia ki shipai ba donkti ha kaba shim iaka jingim ki paradoh parasnam jong ngi” la ong u Assistant General Secretary ka KSU South Central Circle samla Vorrozislov Sohkhlet.
Haba kren sha ki lad pathai khubor u u samla Vorrozislov ula ong ba kane ka jingleh ki shipai BSF ka dei ka jing leh riewkhlaw bad kane kala pyntieng pynsmeij iaki paidbah ba sah ha ki thain khappud.
U samla Vorrozislov ula ong ba ha ka jingshisha, ka jing buh ia ki shipai sha thain khappud kadei ban ai jingshngaiñ ki nongshnong ka thaiñ hynrei kane ka rukom leh jong ki shipai BSF ka long ka jingsyier ia ki paidbah jong ka dong ka thaiñ.
Ula ong ba naka liang ka KSU South Central Circle kan sa leit ban ia kynduh ia ki bor pulit halor kane ka kam bad kala dawa ruh ba nangne shakhmat ki shipai BSF kim dei shuh ban iaid pahara hapoh ka thain Pynursla hynrei kidei ban iaid pahara tang ha ki thain khappud bad ka ri Bangladesh.
