Shillong, Naitung 11 : Haduh khyndai phew ar tylli ki Shnong khappud ka Jylla Meghalaya kin sa kylla long noh ki “Shnong ba Nyngkong ha India”.
Kat kum ka jingong ka Myntri Pla Tyngka ka Ri Nirmala Sitharaman, kine ki khyndai phew ar tylli ki Shnong kila shah jied kum shi bynta jong ka wat ba-ar jong ka Vibrant Village Programme ka Sorkar Pdeng. Kine ki shnong ki dei kiba don ha khappud bad ka Ri Bangladesh.
“Ki 92 tylli ki Shnong na Meghalaya kin sa kylla long ki Shnong ba nyngkong ha India” ong ka Sitharaman haba iakren bad ki nongthoh khubor haba ban jur ia ka jinglong kongsan kine ki shnong ha ka jingiada ia ka Ri.
Ka Nirmala kala pyntip ba kan sa leit ban iuhkjat ha ki katto katne na kine ki shnong khappud ha ka jingleit jngoh jong ka lashai ka sngi haba pynpaw ruh ia ka jingangnud ban ioh iakren iakhana bad ki nongshongshnong ha khappud.
Ka Myntri pla tyngka kala kren ruh halor ka jingpyrshang jong ka Sorkar ban pynroi ia ki shnong kiba don ha ki jaka khappud bad kiwei pat ki Ri kum ka Myanmar, Tiber, China bad Nepal.
Haba kylli halor ka jingpynsangeh ka Sorkar ia ka Border Area Development (BAD) Programme, ka Myntr kala jubab da kaba ong “Ngam tharai ba kan long kumta. Ka song pisa sha ki jaka khappud ka dang iai bteng. La pyniaid ia ka na ka Tnad Pohiing bad Tnad Iada Ri”.
Ka Myntri kala ong ba ka Vibrant Village Programme ka la long mynta ka lynti ba kham bniah ban wanrah ia ka roi ka par ba pura sha kito ki shnong kiba don ha khappud.
Kane ka prokram ka thmu ban plie ia ka lad kamai jakpoh, pynkhlain ia ki lad pyniasoh, ka pule dangle, ka koit ka khiah bad ki jingdonkam ba man ka sngi jong ki nongshongshnong ba sah ha ki shnong khappud.
Ym kum ka Border Roads Programme ba mynshuwa, ka Vibrant Village Programme ka dei ka lynti kaba kham bniah ban leh eiei halor ka roi ka par ha baroh ki liang kiba donkam da kine ki shnong.
