Shillong, Naiwieng 04: Ka Aspire Meghalaya District Talent Events 2022 kaba la sdang naduh ka 6 tarik u Risaw da kaba pynlong ia ki prokram bapher ha kylleng ki District jong ka jylla ha u bnai Risaw bad Naiwieng.
Ka East Jaintia Hills, Ri Bhoi bad South West Khasi Hills kila pynlong iaki prokram haka sngi Palei ha kaba ka jingpyni sap jong ki 22 ngut ha ki 6 tylli ki jaka ha Khliehriat, 21 ngut ki nongpyni sap na ki 5 tylli jaka kiba don ha Nongpoh bad 22 ngut ki nongpyni sap ha ki 5 tylli ki jaka ha Mawkyrwat.
Ka Aishwadaka Dkhar (Singing), Class 9, jong ka Rymbai Government Secondary School, Torimame Dkhar (Singing) Class 9 na Sutnga Presbyterian Higher Secondary School bad ka Shreya Pal (Art & Craft) Class 12 jongka Jaintia Eastern College kila ioh iaka jingithuh kum ki Aspire Meghalaya District Stars jong ka East Jaintia Hills.
Ka Anyzza Lyngdoh (Singing) BA 3rd Semester jongka Ri Bhoi College, ka Banisha Kharsyntiew (Singing) Class 11 bad u Ribanshanbok Mawlong (Singing), Class 12 naka Ferrando Higher Secondary School, Nongpoh, kila ioh iaka jingithuh kum ki Aspire Meghalaya District Stars na Ri Bhoi.
U Richard Marwein (Art & Craft) Class 11 na Nativity Higher Secondary School, Excellency Turnia (Musical Instruments) BA 1st Semester jongka Sngap Syiem College bad ka Phibalari Thongni (Dancing) Class 9 na ka St. Mary’s Higher Secondary School, Rangblang kila ioh iaka jingithuh kum ki Aspire Meghalaya District Stars na South West Khasi Hills.
Ha katei ka prokram la pynkup burom ruh ia ki jaka pule kiba la iashimbynta ha ka Meghalaya Youth Survey 2022 bad Soft Skills Training Interventions lyngba ka Aspire Meghalaya.
Ki la don 18 tylli ki jaka pule na East Jaintia Hills, 25 tylli na Ri Bhoi bad 14 tylli na South West Khasi Hills kiba la shah pynkup burom.
La sdang iaka Aspire Meghalaya hau Lber 2022, da ka jingthmu ban pynshlur iaki khynnah bad samla ha ki shnong ki thaw ha kylleng ki District ban kyntiew iaka sap ka phong ka jong ki bad ban ithuh ruh iaka sap kaba ki don. Kane ka prokram kadei kaba la shimkhia daka tnad Sports & Youth Affairs jong ka sorkar jylla bad la kyrshan da ka State Education Mission Authority Meghalaya (SEMAM) bad la pyntreikam pat ia kane ka projek da ka AVENUES.
Ki 3 ngut kila shah jied na ki District lyngba ka kynhun jongka District Talent Committee ha kaba 36 ngut ki samla donsap kin iakynduh lang haka jingiakob ha ka State Level kaban wan iashimbynta da ki khlur kiba la shah jied na kylleng ki District jong ka jylla.
Ha ka jingialang kaba la long ha Mawkyrwat, u Myntri ka tnad PHE u Bah Renikton Lyngdoh Tongkhar ula pynpaw iaka jingsngewnguh ia u Myntri Rangbah ka jylla halor ka jingiohi jngai khamtam ha kaba iadei bad ki samla bad ban pynkup bor iaki.
Ula ong, ki samla ka thain kit bit haka rwai bad ka shad hynrei kila pyni ruh iaka jingnang bad jingstad ka jongki ha kaban ai jingkren kaba long kaba kongsan tam, namar lada leit hakano kano ka bynta jong ka pyrthei yn ym lah ban kiar ha kaban kren ia ki paidbah.
Ula pynshlur ia ki samla ba kidei ban kren iaka phareng kat kaba ki tip bad kim dei ban lehrain bad kim dei ban sheptieng ia ka jingbym lah ban kren thik pa thik.
U Bah Renik ula ong, ki samla ki long ka lawei jong ka jylla bad da ka jingpynkup bor ia ki mynta kan iarap iaki ban pynlong kum ki Nongialam ban sa wan jong ka jylla.
Ha ka jingialang kaba la long ha Khliehriat, u Myntri ka tnad Social Welfare u Bah Kyrmen Shylla ula ong, “Nga pynpaw iaka jingsngewnguh iaka sorkar jylla hapohka jingialam u Myntri Rangbah bad ia baroh kiba don bynta ha kaban plie ia kane ka lad ka lynti ban sei iaka sap ka phong kaba la buhrieh ha kylleng ki kyndon kynshrot ha kaba baroh ki lah ban iohi”.
Ula pynkynmaw ia ki khynnah pule ba ka sap ka jongki ka long kaba phyla bad ula kyntu iaki ba kin bteng ban trei shitom naduh mynsiem ia kano kano ka sap kaba ki don ha ki.
Ha ka jingialang kaba la long ha Nongpoh, u Commissioner & Secretary ka tnad Arts & Culture u Bah Frederick R Kharkongor, ula ong, ka Aspire Meghalaya ka phaikhmat sha ki mat kiba kongsan hapdeng jong ki khynnah, kata ban pynshlur iaka jingangnud ka jongki bad ba kin iaid shakhmat, ban ai mynsiem ban pynurlong iaka jingangnud bad ban pynkynmaw ruh iaka tynrai ka jongki.
U la pynpaw iaka jingkmen ban iohi ba ki khynnah pule kila ioh iaka jingbatai bad jinghikai bad ban ioh ruh iaka lad ban pyni iala ka sap ka phong.
Haduh mynta kila don 33 ngut kiba la ioh iaka jingithuh na ki 11 District kiba kynthup iaka Eastern West Khasi Hills, North Garo Hills, West Khasi Hills, West Jaintia Hills, South West Garo Hills, East Garo Hills, South Garo Hills, East Khasi Hills, East Jaintia Hills, Ri Bhoi bad South West Khasi Hills.
Kum ban shu kdew katei ka prokram pyni sap ha ki District kan kut ha Tura, West Garo Hills, ha ka 8 tarik u Naiwieng.
