Guwahati, Nailar 21: Ka : Ka National Health Mission (NHM) ka la pynpaw ba kila don haduh 370 tylli ki case jong ki briew kiba shah ktah ha ka jingpang Japanese Encephalitis bad 77 kiba la khlad noh tang naduh u bnai Naitung ba la lah ha Assam.
Kila don arngut ki briew kiba dang shu khlad na kane ka jingpang hapoh Kamrup district. Nalor kata kila don sa arngut kiwei pat kiba la ioh ia kane ka jingpang, kata mar uwei ha Goalpara bad Sonitpur.
Ka kingdon jong baroh kiba shah ktah ha kane ka jingpang Japanese encephalitisa ha ka jylla ka long 377 ngut.
Baroh ki khyndai tylli ki medical colleges ha Assam bad 10 tylli ki district hospital kila long kiba la pynkhreh da ki ICU bad ki tiar ban leh ia ki tes hapoh ki laboratory bad ban ithuh ruh ia kine ki centre kum ki jaka sumar na ka bynta ka jingpang Japanese encephalitis.
Kane ka dei ka jait jingshitom ka ba ktah ia ka jabieng bad kaba saphriang lyngba ka jingshah dait ha ki skain pyrjong. Ia une u khniang jingpang la shem ha ki sniang bad ki sim., bad la pynphriang sha ki skain pyrjong hadien ba kila dait ia kine ki mrad kiba don ia une u khniang jingpang.
Ban tehlakam la la thaw ruh ia ka kynhun Rapid Response team halor ka jingpang Acute Encephalitis Syndrome (AES) ba JE ha baroh kawei ka jylla khnang ban tehlakam ia kane ka jingpang na ka jingsaphriang.
