Shillong, Nailar 25 : U Myntri Rangbah Conrad K Sangma ha ka sngi Ba-ar, ula ong ba haduh 666 tylli napdeng ki 6188 tylli ki Anganwandi Centre ha ka Jylla ki dang treikam na ki Iingwai lane jingtei ba shipor bad ka Sorkar kam shym la pynlit ha kaban pynbha ia ki iing wai namar ka jingbym don jaka.
Haba jubab ia ka jingkylli u MLA ka TMC Dr Mizanur Kazi, u Conrad ula iathuh ha Iingdorbar ThawAin ba ka jingtei bad ka jingmaramot ia 2,148 tylli ki centre la leh ryngkat bad ka Tnad Rural Development bad ka MGNREGS, bad T64 klur la mang hapoh ki Externally Aided Project.
“Na ki 2,148 tylli ki centre, 1,670 la dep ban pyntrei bad ia kiba sah yn sa pyndep noh shen. Ngim shym la pynlut pisa ha kaban pynbha ia ki jingtei jong ki iing ba shipor” pynshai u CM.
Ula ong ba ia ka jingkyntiew kyrdan la leh hapoh ka Meghalaya Early Childhood Development Mission.
Halor ki jingbam tei met, u CM ula ong ba ia ki supplementary nutrition la ai na ka bynta 25 sngi ha ka shibnai- ki jingbam ba dang khluit ia ki khynnah hapdeng ka rta 3-6 snem bad ka ration ba shisien shitaiew ia ki khynnah ba 6 bnai haduh 3 snem, ki kynthei ba armet, ki kmie ba aibuin khun bad ki samla kynthei ba dang khie dang san.
Ka Jylla shen kan sa sam ia ki pylleng kumba arsien ha ka shitaiew kum shibynta jong ki jingbam ba la shet bad ba dang khluit.
U Conrad u iathuh ba la pynlong ruh ia ki jingleit khmih man ka por bad ka social audit ban peitthuh ia ka jingbha ka bam bad ka jingsam ha ka por kaba biang haba kyntu ia ki MLA ba kin pynsngew lada don kino kino ki jingbym biang.
Haba kdew ia ka jingkhein jong ka NFHS, ula ong ba ki khynnah ba pang swai hapoh 5 snem kala hiar n aka 46% sha ka 35% ha kine ki lai snem bad ka jingpang swai kyllumlang kala hiar sha ka 36%, ka jinghiar ba heh ban ia ka national average.
“Ngi kwah ban pynhiar sha ka zero. Ngi la sdang pyntreikam ia ka prokram 1000 sngi ba kynthup ia ki khunlung naduhba dang kha haduh ar snem” ula ong haba bynrap ba baroh ki centre kila don la ki jaka shet wat kim pat ioh ia kaa kamra shet jingshet bala shna la kajong.
