Shillong, Nailar 25 : U Myntri Rangbah ka Jylla Conrad K Sangma ha ka sngi Ba-ar, ula ong ba un sa peit thuh hi shimet iaka jingwadbniah ba kyrpang halor ka jingdon bun ki kynthei armet ba pang anemia (jingduna hemoglobin ha ka snam) ha East Garo Hills.
Ka jingkular kala mih hadien ba u Nongialam ka Liang Pyrshah Mukul Sangma ula pynsngew ia ka jingdon bun ki nongpang anaemia ha ka jingleit jngoh jong u ia ki jaka sumar hapoh ka district, ha kaba bun ki kynthei la hap ban phah sumar shabar ka district.
Haba tuklar hapoh ka Iingdorbar Thaw Ain, u CM ula ong ba ka Sorkar kala buddien ia man ki kynthei ba armet hapoh ka Jylla lyngba ka software ha kine ki hynniew snem bala leit noh haba buhrieh ruh ia ka kyrteng ban ithuh ia ki nongpang kiba don jingma bha.
“Kumba 10-15 % ki dei ki Kmie kiba don jingma bha bad bun na ki, ki dei kiba pang duna snam. Ngi la don ia ka jingkhein ha baroh kawei ka Jylla” ongu Conrad haba bynrap ba ia kum kine ki kmie la pynkynriah noh sha ki mother home 15 sngi shuwa ba kin kha bad ai ia ka jingbam tei met bad ka jingkyrshan pisa.
Haba pynpaw ba ki prokram bala pynleit jingmut ha kane ka bynta kala iarap ban pynduna ia ka jingiap ki Kmie ba kha khun da 55% ha kine ki hynniew snem-ka jinghiar ba bun tam hapoh ka Ri, uConrad ua ong “Ngim kwah ba ki Kmie kin duh noh iala ka jingim haba wanrah jingim sha ka pyrthei. Ngan sa khmih hi shimet halor kane bad ngin sa leh ia ka audit ba kyrpang bad sa shimkhia kyrpang ha EGH”.
Shuwa kane, u Mukul Sangma ula ong ba ka anaemia la sumar kum kiwei kiwei ki jingpang haki CHC bad PHC ki district badn ban jur ia kajingpyniasoh hapdeng ka jingbam tei met ia ki longkmie bad ka jingpang ringswai jong ki khynnah.
 ha East Garo Hills.){kind=link}