Shillong, Nailur 16 : Ka Langsning FC ka la ioh ban pynliem haduh 5-2 kol ia ka Ryntih FC ha la lympung ialehkai jong ka Shillong Premier League kaba long hynne ka janmiet ha madan Third Ground Polo.
Ha ka jingialehkai kaba pynshongshit bha da ka jingbun ki kol ba ioh thep dei ka Langsning kaba ioh thep kol nyngkong lyngba u Kitbok lang Pale ha ka minit kaba 5. Utei u rangialehkai uba ioh ruh ban thep hat trick u la ioh ruh ban thep kol biang ha ka minit kaba 22 bad ha ka minit kaba 85 jong ka kylla miet.
Ia ki ar tylli ki kol jong ka kynhun la ioh ban thep da u Kevin Rymbai ha ka minit kaba 45 bad ia ka kol kaba khatduh bad kaba san la ioh ban thep ha ka minit kaba 90+2.
Ia ki kol jong ka Ryntih ha kane ka sngi pat la ioh ban thep baroh ar da u Mebankhraw Wahlang ha ka minit kaba 34 bad ka minit kaba 78 jong ka kylla miet.
Ka jingiakhun la shai ka sngi pat kan long hapdeng ka Rangdajied United kaba don ha ka kyrdan kaba ar pyrshah iaka Mawlai kaba don ha ka kyrdan kaba nyngkong.
