Shillong, Lber 29 : Haduh saw tylli ki Municipal Board (MB) ka Jylla ki khlem lah ban pynkhreh ia ki Annual Account ne ka jingkhein jingdiah ba shisien shisnem, ong ka Annual Technical Inspection Report (ATIR) halor ka jingtreikam ki Urban Local Bodies kat haduh ba kut jong ka 31 tarik Lber, 2018, kaba la wanrah ha Iingdorbar ha ka sngi ba-ar.
Kine ki kynthup ia ka Resubelpara, Jowai, Williamnagar bad ka Baghmara Municipal Board.
Ka kaiphod ka ong ba ka Shillong Municipal Board ruh ka khlem lah ban pynkhreh ia ka Annual Account jong u snem 2017-2018 watla kala dei ban pyndep haka 31 tarik Naitung, 2018.
Halor ka daw ka jingbym lah pynkhreh ia ka Annual Account, ka Resubelpara Municipal Board kala ong ba kam shym la don satia ka jingai jinghikai ia ki OPhisar bad ki Nongtrei katba ka Baghmara MB kala ong ba ka hap pynkhreh ia ka Account kat kum ki kyndon bala buh hynrei kam shym la don satia ka jingpynkhreh ia ka Annual Account lane Financial Statement. Ka Jowai MB ka ong ba kam don satia ia ki Nongtrei kiba nang lane ki Chartered Accountant ban ai jingmut katba ka Williamnagar MB ka ong ba kam don satia ia ki stad leh computer.
Ka ATIR kam shym la pdiang satia ia kine ki jingai daw jong kine ki Municipal Board halor ka jingbym lah pynkhreh ia ka Annual Account. Ka ATIR kala phah ruh ia ki jingai jingmut ba baroh ki Municipal Board ki dei ban pynkhreh ia ki Annual Accounts hapoh ka por bala buh bad lada donkam, dei ban ai jinghikai ia ki Accountant jong kine ki Board.
Pule lang ia kane: Dawa ka HYC na ka Sorkar Jylla ban khmih biang iaka Roster System
