Shillong, Nailur 20 : Ka Shillong Lajong FC ka la ioh ban pynliem haduh 4-0 kol ia ka Malki ha ka jingiakhun ba khatduh jong ka Shillong Premier League kaba long hynne ka sngi ha madan Third Ground Polo.
Ha ka jingiakhun ka Shillong Lajong ka la ioh ban thep ar tylli ki kol ha ka kylla step bad ar tylli pat ha ka kylla miet.
Ia ka kol kaba nyngkong ka kynhun ka la ioh ban thep ha ka minit kaba 34 lyngba u Gladdy Kharbuli katba ia ka kol kaba ar pat lyngba u Samuel Vanlal. Tad haduh ban da kut ka kylla step ka Malki ka khlem lah satia ban pynphai wat tang shi kol ruh.
Haba poi pat ka kylla miet ka jingiakhun ka la nang itynnad namar ki rang ialehkai ka Malki ki la pyrshang tyngeh ban thep kol tangba kim shym la iohlad satia.
Pynban ha ka jingialehkai ka Lajong ha ka minit kaba 68 ka la ioh biang sa shi kol lyngba u Wadajied Ryngkhlem bad tang hadien katto katne minit kata tang ha ka minit kaba 75 ka la ioh biang sa shi kol na u Gladdy kaba dei ka kol kaba ar jong u ha katei ka sngi.
Kumba long mynta katei ka jingjop ka la pynlong ia ka Shillong Lajong ban don ha kyrdan ba san da ki 17 point katba ka Malki pat ka neh hajuh ha kyrdan ba 7.
Ka jingiakhun lashai ka sngi ka 21tarik kan long hapdeng ka Nangkiew Irat kaba don mynta ha kyrdan kaba 6 pyrshah ia ka Mawkhar kaba don ha trai duh jong ka miej khein point.
